Aningaasaqarneq ajunngivippoq - inuusuttulli pingaartumik suliffeqanngillat

Inuiaqatigiit aningaasaqarniarnerat piffissami matumani ajunngeqaaq. Aningaasaqarnermut SIunnersuisoqatigiit ukiup affaanut nalunaarusiamini taama inerniliipput.

Pingaartumik saarullinniarneq aningaasarsiorfiuvoq innuttaasulli amerlanerusut aningaasanik aamma atuinerulerput. 

Aningaasaqarnermut Siunnersuisoqatigiit aningaasaqarnerup 1,3 procentimik ukioq manna qaffariarnissaa aappaagulu 1,5 procentimik qaffariarnissaa naatsorsutigaat. Tamanna isumaqarpoq, nuna suliaqarfiunerullunilu tunisaqarfiunerusoq.

Siuariarneq 2022-mili aatsaat 1 procenti sinnerpaa.

- Ataatsimut isigalugu ilimagisat aalisarnermi isertitat qaffasikkumaarnerannik, tunngavissallit nunarsuarmi niuerfinni akit pitsaasuunerannik saarullinniarnerullu siuariarneranik annertuumik pinngitsuuisinnaannginneranik tikkuussipput, nalunaarusiami allassimavoq.

Naalakkersuisut Suila-tapit 2025-mi atulersippaat. Tamanna innuttaasut amerlanerusut aningaasanik atuinerunerannik kinguneqarpoq inuiaqatigiinnullu naleqarnerulersitsilluni.

Suliffissaaleqineq tamanna ilutigalugu appariarpoq.

Aningaasaqarnermulli Siunnersuisoqatigiit, pingaartumik inuusuttut, qanoq sulilersinneqarnissaannut ilinniagaqalernissaannulluunniit siunnersuuteqarput. 

Suliffissaaleqisukinnerulersoq

Inuiaqatigiinni aningaasat ima amerliartupallatsigaat suliffissanik pilersitsinissamut aningaasassaqarnerulerluni.

Suliffissarsiortulli ikinneruleraluartut nunatta avataanit suliartortartut amerlanerulernissaat naatsorsuutigineqarpoq.

Aningaasaqarnermut Siunnersuisoqatigiit najukkami ilinniakkamik, soorlu atugarissaarnermut ikiortitut ittumik pilersitsisoqarnissaa siunnersuutigaa. Taakkua ilinniakkap najukkami sulisunik pisariaqartinneqartunut iluaqutaanissaa ilinniagaqaqqinnissamullu tunngavissatut atorneqarsinnaasoraat. Assi © : KNR

Nuna tamakkerlugu suliffissarsiortutut nalunaarsoqqasut ukioq manna 3,8-mit 3,4 procentit tungaannut ikileriassangatinneqarput - 2024-mi kisitsisit assigalugit. 

Naatsorsueqqissaartarfiup nalunaarsugai naapertorlugit inuit suliffissarsiortutut ukioq manna aggustimi nalunaartut, ukioq kingulleq taamaalinerani suliffissarsiortunit 243-nik ikinnerupput.

Sulisut amerlassusaat 2024-mi kingullermik kisitsisinngorluit nalunaarsorneqarput. Taakkunannga inuit Danmarkimi inunngorsimasut 9 procentiupput nunattalu avataaneersut allat suliffinni tamani 4,4 procentiullutik. 

Nunani allani innuttaassusillit 280-inik siorna taamaalineranut sanilliullugu amerleriarsimanerat tassunga ilanngunneqarsinnaavoq. 

Inuusuttut suliffillit amerlanerulersut

Suliffissarsiortunut tunniuttakkat akissarsiat minnerpaaffissaata 90 procentiinik ullumikkut naleqarput. Taamaattumik Aningaasaqarnermut Siunnersuisoqatigiit inuusuttut 25-liineqanngitsut aalajangersimasut sulilernissaminnut piumassuseqanngitsutut oqaatigaat. 

Suliffeqanngitsutut piareersimasussaatitatut malittarisassat ukioq manna sukaterneqarput. Aningaasaqarnermut Siunnersuisoqatigiit pingaartumik inuusuttut amerlanerusut sulilissappata sukatereqqinnissaq innersuussissutigaat.

Avannaata Kommuniani borgmesterip, Lars Erik Gabrielsenip (S) suliffissarsiortut pillugit oqallinneq siorna qaqippaa. Taassuma amerlasuut naak napparsimanngikkaluarlutik sulisinnaagaluarlutillu sulerusunnginnerartartut maluginiarsimallugu oqaatigaa. Taasuma inatsimmik nutaamik atulersitsinissaq siunnersuutiginngilaa, atorfillillu inatsimmik atuutereersumik sukannernerusumik paasinnittaleqquai. Assi © : KNR / Markus Valentin

Siunnersuisoqatigiit oqarnerat naapertorlugu politikerit suliffissarsiortunut ikiorsiissuteqarfigineqartunut pinngitsoorani 'suliffimmi suliaqartitsinermiittarnissamik' atulersitsinissaat isumaliutigeqquaat.

- Kommuninit aqunneqartumik aaqqissuussinerni peqataanermik piumasaqaatitaqartinnissaa isumaliutigineqarsinnaavoq, tassani suliffissarsiornermi ikiorsiissutinik tigusisartut inuiaqatigiinnut iluaqutaasunik sulianik ingerlatsinerat utaqqiinnarluni aningaasanik pisartagaqarnermut allatut periusaasinnaavoq, Aningaasaqarnermut Siunnersuisoqatigiit nalunaarusiami allapput.

- Suliffeqarnermi periuseq inuusuttunik sukkanerusumik ilinniagaqalersitsilluniluunniit suliffeqalersitsisup ilersinneqarnissaa/attanneqarnissaa suliaqartitsinermi siunertaassaaq.

Siunnersuisoqatigiit politikerit nunap immikkoortuani aalajangersimasumi soorlu Tasiilami suliffissaaleqisut amerlaneruffigisaanni misiliutitut aaqqissuussinermik aallartitaqaqqaarsinnaanerat innersuussutigaat.

Nuummi ilinniarnissamut suliffeqarnissamullu periarfissaqangaatsiartoq nunatta kujataani Tunumilu tamanna ajornartorsiutaavoq.

- Kujataata nunattalu kangiata innuttaasut piffimmit nussornerat immikkut malugisimavaat. Piffinnilumi taakkunani suliffissaaleqineq inuusuttullu suliffissaaleqinerat annertuvoq, Aningaasaqarnermut Siunnersuisoqatigiit allapput.

Naalakkersuisut Tasiilami ilinniarfeqarfimmik nutaamik pilersitsinissaq qaammatip siuliani siunnersuutigaat. Ilinniarfik nutaaq inuusuttut kitaanut Danmarkimulluunniit ilinniariartorlutik nuussortarnerisa ajornartorsiutaaneranut annikillisaataassaaq.