Kommune Qeqertalik 50 millionit koruunit sinnerlugit amigartooruteqartussanngortoq
Kommune Qeqertaliup 50 millionit koruuninik ukiup naanissaanut amigartooruteqarnissaa ilimagineqarpoq. Tassani kommunalbestyrelsip tamanna pillugu pingasunngornermi ataatsimiissasut borgmesteri Simigaq Heilmann oqarpoq.
Allattoq Jonna Enoksen Dahl
oktobarip 21-at 2026 15:51
Kommunip missingersuutini 18,1 millionit koruuninik qaammatini pingasuni siullerni sipporai, aasaq juunimi saqqummerpoq.
Atuineq taamaaginnassappat Kommune Qeqertalimmi 72 millionit koruuninik ukioq naatinnagu atuisoqarnerussasoq ilimagineqarpoq.
Maanna taama ajortiginngilaq.
Kommune Qeqertalimmi aningaasanik 50 millionit koruunit sinnerlugit ukiup naanissaanut amigartooruteqarnissaa naatsorsuutigineqartoq borgmesterip Simigaq Heilmannip Facebookikkut ataasinngormat saqqummiuppaa.
Kommunip 683 millionit koruunit ukioq manna isertissallugit, taavalu 616 millionit koruunit aningaasartuutigissallugit missingersuutaareersut naapertorlugit naatsorsuutigigaluarpaa.
Kommunalbestyrelsip immikkut ittumik ataatsimeeqattaartut
Aningaasanik amigartooruteqarneq pillugu kommunalbestyrelset immikkut ittumik ukioq manna ataatsimeeqattaartut, Simigaq Heilmann oqarpoq.
-Kommunalbestyrelset aaliangigaat inaarutaasumik aaliangiiffiusarmata taamaammat neriuutigaara akisussaassusilimmik kommunitta aningaasaqarnera siumut saatseqqinniarlugu tamatta akisussaaffimmik tiguseqatigiikkumaartugut.
Kommune Qeqertalimmi borgmesteri Simigaq Heilmann.
Kommunalbestyrelsip septembarip ulluisa qulinganni ataatsimiinneranni imaqarniliaat naapertorlugu, Kommune Qeqertalik 56,4 millionit koruuninik amigartooruteqarnissaa naatsorsuutigineqareerpoq.
Sippuinerit ataatsimiititaliani aalajangersimasuni agguataaqqapput.
Ataatsimiititaliami Timi Tarnimi, timersorneq, kulturi, sunngiffik, peqqissuseq aamma pinaveersaartitsineq pillugit suliaqarfiusumi, 8.4 milliionit koruuninik sippuisoqarpoq.
Ataatsimiitsitaliamilu Inoqarfimmi 9,6 millionit koruuninik sippuilluni.
Ataatsimiititaliap taassuma suliassaqarfippassuaqarfiusup suliassai tassaapput: Oqartussatut atuuffik, innuttaasunik sullissineq, inuussutissarsiutit, iIloqarfimmik inerisaaneq, ineqarneq avatangiisillu, angallanneq, attaveqaatit, pilersuineq aamma suliffissaqartitsineq.
Aasiaat immikkut ittumik sammineqarnissaa aamma saqqummiunneqarpoq.
Illoqarfik 21,9 millionit koruuninik sippuivoq, 43,8 millionit koruuninilluukiup naanissaanut atuinerunissaa ilimagineqarluni.
Innuttaasunut sunniuteqarsinnaasoq
Kommunalbestyrelsip aningaasaqarnikkut sippuineq iliuuseqarfigineqartariaqartoq septembarimi ataatsimiinnermi oqariartuutigaat.
Tamannalu Simigaq Heilmannip paasisinnaallugu oqaatigaa.
-Akuerinngilarput taamatut ingerlaneq. Ataatsimiitsitaliani suliaqartitsisoqarnissaa piviusunngortinneqassasoq tamarmiullutik piumasarivaat taannalu uanga borgmesteritut naammassisussaavara kommunalbestyrelsip piumasaat malillugu suliaqartitsissallunga.
Aningaasanik amigartooruteqarujussuarnissaq pissutigalugu Kommune Qeqertalimmi sipaarniartoqalersinnaasoq borgmesteri oqarpoq.
Kommunalbestyrelsip ullumi ataatsimiinnermini iliuusissatut aaliangiussinnaasai ima oqaluttuarai:
-Sulisut ikilisarneqassanersut immaqaluunniit sanaartugassanik aningaassaliissutigut millisassanerigut immaqaluunniit sulisut taakkua pigiinnarlugit allatut qanoq ingerlatsinerup iluani sipaarniuteqarnissaq ornissaneripput.
Kommunalbestyrelsip aningaasaqarnikkut sukateriniarluni ullumi ataatsimiinnera innuttaasunut qanoq sunniuteqassanersoq, borgmesterip oqaatigisinnaanngilaa.
-Oqallinnissaq pissanganartorujussuuvoq. Uanga sapinngisamik innuttaasunut ajorseriaataannginnissaa taanna angorusuppara kisianni pinngitsoorani aaliangerneq ilaatigut imaannaanngitsunik malitseqarnissaa naatsorsuutigaara aamma aningaasarpassuit uani pineqarmata.
