Imigassat aalakoornartullit matuneqarmata utoqqaat illuanni sulisunik sulinngitsoortoqannginnerulertoq
Qaqortumi Ajarsivasimmi pisortap Naja Kriegelip, imigassat aalakoornartullit oktobarip aappaanni tunisaajunnaarnerisa kingorna, sulisut nalunaaratik sulinngitsoortartut ikilinerarpai.
- Imigassap matuneqarnera pitsaasumik malugaarput, KNR-imut oqarpoq.
Utoqqaat illuanni eqqiaasut, igaffimmiut isumaginnittullu katillugit 40-t missaanniipput.
Utoqqaat piginnaasaqarnerit, ikiortariallit puigortunngortullu paaqqutarisarpaat.
Sulisoq ataaseq sulinngikkaangat suliffimmi tamarmi sunniuttarpoq.
- Assersuutigiinnarlugu maani unnuarsiortuusarput aalajangersimasumik sisamat. Taava ataaseq peqanngikkaangat pingasuinnanngoraangata illorsuarmut tamarmut malunniuttarpoq, Naja Kriegel oqarpoq.
Akissarsisoqareeraangat sulinngitsoortoqartarnera
Ulluinnaat suliffiusut kisimik aalaakkaasumik suliffigineqarnerulinngillat.
Pisortap oqarnera naapertorlugu, ajornartorsiummut uteqqiasumut aamma allannguivoq:
sulisunut, SUILA-mit tapisisimatillutik sulinngitsoortartunut.
- Sulisut SUILA-mit tapisisimatillutik, ajoraluartumik nalunaaruteqaratik ilaanni suliartunngitsoortarput, taakkua unipput, pisortaq oqarpoq.
Imigassamik aalakoornartortalimmik matusineq utoqqaat illuannut iluaqutitaqarpoq, tamannalu inoqatinut attaveqaqatigiiffimmi matusisoqarnera pillugu oqallittoqangaatsiarnerani akerliunermut tapersersuinermulluunniit tunngavilersuutaanerpaat ilaanniippoq.
Sunniutaasup ingerlatiinnarneqarnissaa neriuutigigaa
Naja Kriegelip suliartortartut patajaannerunerata imigassamik aalakoornartortalimmik nioqquteqarneq ammaqqikkaluarpallunniit ingerlaannarnissaa neriuutigaa.
Sulisullu siusinnerusukkut sulinngitsoortartut patajaannerusumik sulinerminni akissarsiaqarnerullutik aamma malugisinnaassavaat.
- Soorunami neriuutigaara taama pissuseqartartut qaatuallalaarsimassasut. Aamma aningaasat tungaatigut malugissagamikku. Sulinerummatami tamakku suliartunngitsoortartut. Neriuppunga takugunikku taanna aamma imigassaq ammaraluarpat taamatut suliuartassasut taama akissarsiaqarusukkunik, taanna oqarpoq.
Forstanderillu imigassamik aalakoornartortalimmik matusineq marloqiusamik isumaqarfigaa.
- Inuttut ammaqqinnissaa soorunami neriuutigaara. Kisiat sulisitsisutut ilumoortumik oqassaanga matoqqaannarniarli.
Matusineq neriniartarfinnut imerniartarfinnullu kingunerluuteqarpoq. Suliffeqarfiit arlallit sulisuminnik soraarsitsisariaqarsimapput.
Ajarsivasimmili sulisut amerlanerusut sulinerannik kinguneqarpoq.
Kommune Kujallermi imigassamik aalakoornartortalimmik pisiniarfinni, imerniartarfinni neriniartarfinnilu qaqugu tuniniaasoqaqqilersinnaanera suli ilisimaneqanngilaq.
Kommunip qaqugu aammaaqqittoqarsinnaanera suli nalunaarutiginngilaa.
