Løkke: EU-p Issittoq pillugu periusissiornera Europap sunniuteqarluarnerulernissaanut iluaqutaassaaq
Danskit nunanut allanut ministeriata Lars Løkke Rasmussenip (Moderaterne) EU-kommissionip Issittoq pillugu periusissiaa nutaaq X-imi allaaserisamini "tigulluarnerarpaa“.
- Issittoq nunarsuarmi politikki allanngorartillugu pingaaruteqaleraluttuinnarpoq. EU-p Issittoq pillugu periusissiaa tikilluaqqulluinnarpara, Lars Løkke Rasmussen allappoq.
EU-mi kommissionip periusissiaq marlunngornermi saqqummiuppaa, EU-milu nunanit maanna oqallisigineqassaaq.
Periusissiaq taanna periusissiami kingullermi 2021-meersumit allaanerulluinnarpoq. EU-Kommissionip isumannaallisaaneq maanna pingaartinneruniarpaa.
Tamatuma saniatigut nunap immikkoortuani aningaasaliinerit annertusiartupiloorput.
Tamanna eqqortuliorneruvoq, Lars Løkke Rasmussen periusissiaq pillugu taama oqarpoq.
- Tamanna EU-p nunap immikkoortuani sunniuteqarnerunissaanut aqqutissiuissaaq - Issittumi innuttaasunut iluaqutaasumik. Aammali Europamut qanimullu suleqatitsinnut iluaqutaassaaq, Lars Løkke Rasmussen X-imi allappoq.
Ataatsimoorussamik nalunaaruteqarnerup kinguninngua
Periusissiaq EU-kommissionip siulittaasuata, Ursula von der Leyen-ip, Kalaallit Nunaannut septembarimi tikeraarnerata kinguninngua saqqummiunneqarpoq.
Tassani Kalaallit Nunaata naalakkersuisuisa siulittaasuat, Jens-Frederik Nielsen, ministeriunerlu, Mette Frederiksen (S), suleqatigiinnerup nakussassarneqarnissaa pillugu nalunaarummik ataatsimoorussamik atsioqatigiipput.
Nalunaarummi EU-p Kalaallit Nunaanni ilaatigut digitalimik attaveqarnermut 1,5 milliardit koruuninik aningaasaliinera tunngavigineqarpoq.
- Tamanna ilumoorussinitsinnut takussutissaavoq. Digitaliseerinissaq mingutsitsinngitsumillu nukissiorneq suleqatigiissutigilissavagut, aamma siunissami qaninnerulernissarput EU-p Kalaallit Nunaatalu soqutigigaat ersarissumik paasineqarpoq, Dan Jørgensen oqarpoq.
Jens-Frederik Nielsenip Kalaallit Nunaata EU-mut ilaasortanngorniarsarinnginnera tikeraartoqarnerani erseqqissaatigaa.
Kalaallit Nunaannili namminiilivinnissamik takorluugaq suli piviusuuvoq, tamannalu periusissiami aamma akuerineqarpoq, Dan Jørgensen oqarpoq.
Immap killeqarfiinik attaveqaasersuutillu illersorneqassasut
Aammattaaq Europap Issittumi iliuuseqarnissamut piginnaaneqarnerunissaa periusissiami anguniarneqarpoq.
Europami sikusiutit amerlanerulernerisigut ilaatigut taamaaliortoqassaaq.
EU-mi kommissionimit paasissutissat naapertorlugit, EU-mi nunat 27-t sikusiutinik katillugit qulinik peqarput, Ruslandilu sikusiutinik 40-nik missaanni peqarsorineqarpoq.
Aammattaaq EU-p Kommissioniata avannaani imartami killeqarfiit immallu naqqani attaveqaasersuutit pingaarutillit illersorneqarnerulernissaat periusissiami siunnersuutigaa.
Tamanna imaatigut isumannaallisaanermut qitiusumik nutaamik pilersitsinikkut ilaatigut pissaaq, tamannalu Issittumi imarsiornermik nakkutilliinermut iluaqutaassaaq.
EU-p kommissionia Atlantikup avannaani Issittumilu immap naqqatigut kabelinik nakkutilliinissamut, illersuisuinissamut iluarsaassisarnissamullu "issittumi kabelinut tunngatillugu sullissivimmik“ aamma pilersitsissaaq.
RITZAU
