EU-p Issittoq pillugu periusissiariligaa: Immap naqqatigut kabelit, sikusiutit isumannaallisaanerlu
EU-p Issittoq pillugu periusissiaa marlunngornermi nutarterneqarpoq.
KNR-ip naalakkersuisut periusissiassatut siunnersuutaat siornatigut allaaserereerpaa.
Europa-Kommissionip siulittaasuata Ursula von der Leyenip ullormi saqqummiussinermi, periusissianngortoq Ruslandip sorsunneranut qisuariaataanerarpaa.
- Ruslandip Issittumi sakkutuulersoqqinnera saniliminullu assigiinngitsutigut periuseqarsinnaanera takugutsigu, Issittumi EU-milu isumannaallisaaneq allanngortinneqartariaqassaaq, Ursula von der Leyen oqarpoq.
- Oqartussaassuseqarneq, nunat killeqarfiisa ataqqineqarnerat malittarisassallu nunap immikkoortuani eqqissisimatitsisut ataqqineqarunnaarpata iliuuseqartariaqarpugut. Uatsitut eqqarsartaasillit peqatigalugit naleqartitagut illersussavagut.
EU-mi qaffasissumik atorfillip oqarneratut, Ukrainemi sorsuttoqarunnaarpat, Issittoq pissaanilissuarnit ukkatarineqalersinnaavoq.
- Sorsuttoqarunnaarpat Issittoq ukkatarineqaleratarsinnaavoq. EU-llu peqataanissaa namminerlu aalajangiisinnaatitaaginnarnissarput pingaaruteqarput, pisortani atorfilik oqarpoq.
Pisortani atorfillip oqarneratut, periusissiaq nutaaq taaguummut ‘issittumit isiginninnermut’ tunngaveqarpoq.
- Tassa imaappoq aalajangernerit Issittumi innuttaasunut qanoq isumaqarneri tunngavigaagut. Politikkikkut sammisani taakkunani tamani innuttaasut avaqqutiinnarnagit suleqatigiissuteqarfiginissaat pingaaruteqarpoq, atorfilik oqarpoq.
Ursula von der Leyenip oqaaseqarnermi periusissiami nutaami Issittumi innuttaasut aallaavigineqarnerarpai.
- Issittoq Issittumi innuttaasut, ilaqutariit, najukkami inuiaqatigiit, nunat inoqqaavi inuusuttullu Issittumi siunissaminnik pilersitsisut pigaat. Angerlarsimaffigaat. Taamaammat periuseqarnitsinni taakku qitiutittuaannarpagut, Ursula von der Leyen oqarpoq.
Issittumi nunat pingasut EU-mi ullumikkut ilaasortaasut tassaapput: Finland, Sverige, aamma Danmark Kalaallit Nunaat aqqutigalugu.
Sikumik aserorterissutit, imaatigut kabelit internettimullu attaviit suliniutit nutaat ilaanni ukkatarineqarput.
Imaatigut qaammataasatigullu internettimut attavik
EU Kalaallit Nunaata sineriaani internettimut attavinnik pitsaanerulersitsiniarluni imaatigut kabelimik nutaamik pilersitserusuppoq.
Kabeli Canadamut Japanimulluunniit atassuserneqarsinnaassaaq. Qanoq taamaaliortoqarsinnaanera EU-p misissornialeruttorpaa.
EU Kalaallit Nunaanni kabelinut suliniummut 107 millionit euronik - tassa 800 millionit koruunit nalinganik aningaasaliissuteqareersoq periusissiami allassimavoq.
Ursula von der Leyenip EU-mi qaammataasat aqqutigalugit sinerissami internettip pitsaanerulersinnissaanut isumaqatigiissut septembarimi atsiorpaa.
EU-p internettimut attaviit pitsaanerusut pilersinniarlugit qaammataasat amerlanerulersinniarlugit periusissiami nutaami allappaa.
Unionip tamatuma saniatigut Issittumi kabelinut hubsit pilersissavai. Taakku sumut inissinneqassanersut suli ilisimaneqanngilaq.
Hubsit imaatigut kabelinik nakkutiginninnissamik illersuinissamillu siunertaqarput.
Taakkuli Ruslandimiut umiarsuaat malunnarunnaarsagaasut - tassa russinit pigineqaraluarlutik russit erfalasuannik atuinngitsut unioqqutitsisumik aalisarnerat aamma nakkutigissavaat.
Sikusiutit
EU-p sikusiuteqarnerulernissani periusissiami nutaami siunnersuutigaa.
Taakku imaatigut kabelinik iluarsartuussinermut, inuinnaat sillimaniarnerannik pitsaanerulersitsinermut, ilisimatusarnermut aamma dual-use-imut atorneqassapput.
- Sillimaniarneq akiuussinnaanerlu immikkoortuni pingaarnerullutillu russit siooranarneranut akissutaapput. Uani sikumik aserorterissutit ukkataraagut, EU-mi qaffasissumik atorfilik oqarpoq.
- Sikunik aserorterissutinik sanaartornermi ilusilersuisunilu siuttut EU-mi pingaartumik Finland najugaqarput. Aserorterissutilli amerlanerunissaat pisariaqartinneqarpoq.
Sikumilli aserorterissutinut aningaasaliisoqannginnerani EU-p pisariaqartinneqartoq qulaajaqqaassavaa.
Saniatigut nunat ilaasortaasut sikunik aserorterissutaatiminnik avitseqatigiilluarnerulernissaat siunnersuutigaa.
