EU-mut suli amerlanerusunik isumaqatigiissuteqartoqarsinnaasoq

Europa-Kommissionip siulittaasua, Ursula von der Leyen, Naalakkersuisut siulittaasuat, Jens-Frederik Nielsen (D) aamma Mette Frederiksen (S) Katuami tusagassiortunik marlunngornermi katersortitsipput.

EU-Kommissionip siulittaasuata Kalaallit Nunaannut suleqatigiinnissamut isumaqatigiissut nutaaq, 200 millionit euronik, tassa 1,5 milliardit koruunit missaannik aningaasartaqartoq tassani oqaluttuaraa.

Aningaasaliissutit aatsitassanut pingaaruteqartunut, takornariaqarnermut, ineqarnermut, nukissiuutinut ilisimatusarnermullu ilaatigut atorneqassapput.

Jens-Frederik Nielsenip EU Danmarkilu interneti pillugu isumaqatigiissut ullormi tassani aamma atsiorpaa. Qaanaami qaammataasatigut attavik atorlugu internetip sukkassusaa 15 megabittimut sukkanerulersinneqarsinnaavoq.

Tamatuma saniatigut tamanna Savissivimmut, Ittoqqortoormiinut Tasiilamullu aamma atuutissaaq.

KNR-ip nunat tamalaat akornanni suleqatigiinnermut Europa-kommissæri, Jozef Síkela tusagassiortunik katersortitsisoqanngitsiartoq naapippaa.

Taanna isumaqatigiissutip ilaatut isumaqatigiissutigineqarsinnaasunik saqqummiussivoq.

- (Europa-Kommissionip aaqq.) Kalaallit Nunaannut ukiup aggersup ingerlanerani missingersuutitut siunnersuutissaani aningaasarpassuit sunniuteqarluarsinnaasut Kalaallit Nunaannut iluaqutaanissaat qulakkeertussaavarput.

- Isumaqatigiissutit kalaallit innuttaasut peqataatinnagit piviusunngortissinnaanngilagut.

EU Kalaallit Nunaanni qanoq inissisimalissanersoq aperineqarami nunat tamalaat akornanni suleqatigiinnermut kommissæri, Jozef Síkela ima akissuteqarpoq: - Kalaallit tamanna aalajangigassaraat. Ataatsimoornikkut attaveqaatinik nukittorsaaneq naammassinninnissarlu anguniagaraarput, tamannalu aallaqqaataaniilli isumassarsiaavoq. Assi © : Henriette Simonsen / KNR

Isumaqatigiissutit arlallit aallaqqaatigigaat

Jozef Síkelap EU-p issittumut periusissiaanik allannguinissamut suliaqarneq februaarimili aallartinneqarnerarpaa.

Jens-Frederik Nielsen taamani sillimaniarneq pillugu ataatsimeersuarnermut peqataajartorluni Münchenimukarpoq, tassanilu taakku marluullutik siullerpaamik oqaloqatigiillutik.

- Taamaammat politikkikkut nalunaarutinit ullumikkut piviusunngortitsisinnaanerput nuannaarutigaara, Jozéf Síkela oqarpoq.

- Suliniut uku tamarmik attaveqaatinut, Kalaallit Nunaata aningaasaqarneranik assigiinngisitaarinissamut, innuttaasut inuunerannik pitsanngorsaanissamut tunngassuteqarput.

Kommissærip Kalaallit Nunaannut aningaasaliinermut tunngatillugu paasissutissat sukumiinerusut ingerlaavartumik erseqqissarneqartassasut oqaatigaa.

- Suleqatigiinnissamut isumaqatigiissut maanna atsiorneqarpoq, taannalu suliniutinit aalajangersimasunit angusassanillu aalajangersimasunit siulliuvoq, Jozef Síkela oqarpoq.

- Tamatuma kingorna suleqatigiinnissamut isumaqatigiissutip paasissutissartai immikkoortuisa aappaanni pingajuannilu saqqummiunneqarumaarput.

Isumaqatigiissutit taamaattut ilaasa saqqummiunneqarnissaannut qanoq sivisutigisarpa?

- Suleqatigiinnissamut isumaqatigiissut ukiuni tulliuttuni marlunni atuutissaaq. Tamannali pilersaarutit tamarmik naammassineqarnissaanik isumaqanngilaq. Aatsitassarsiornissamut suliniut assersuutigigaanni tassani silap qanoq innera apeqqutaassaaq.

- Tassa imaappoq suliniutit ilaat sivisunerusinnaapput.