Borgmesterip atuivallaartoqarnera qisuariaateqarfigigaa
Kommune Qeqertalimmut ukioq manna aallartilluanngilaq.
Kommunip missingersuutini qaammatini pingasuni siullerni 18,1 kommunit koruuninik sippuiffigai. Atuineq taama ingerlaannassappat Kommune Qeqertalimmi ukioq naatinnagu 72 millionit koruuninik atuisoqarnerussaaq.
- Soorunalimi killiffiup taama inissisimanera ernumanartutut isigineqarpoq, kommunalbestyrelsimiit soorunami aamma uanninngaanniit, Kommune Qeqertalimmi borgmesteri, Simigaq Heilmann (D) KNR-imit apersorneqarnermini oqarpoq.
Kommunip aningaasaqarnini aaqqiissuteqarfiginiarlugu suliniut arlallit aallartissimagai taassuma oqaatigaa:
- Tassa takusinnaavarput taamatut ingerlaannarutta suli ajornerusumik kinguneqartussaasoq, taamaammat aningaasaqarneq ajunnginnerusumut sangutinniarlugu qanoq iliuusissamik pilersaaruteqartoqassasoq massakkut piumasarinikuuarput.
Oquk pingaarnersiukkallu
Kommune Qeqertaliup aningaasaqarnerata aallartinnerlunneranut pissutsit arlaliupput.
- Ukiup sisamararterutaani siullermi aningaasanik 18 millioninik atuivallaarsimaneq akissarsianut tunngassuteqarpoq, aamma missingersuutit ilaatigut naleqqussarneqarsimannginnerinut, Simigaq Heilmann oqarpoq, nangillunilu:
- Saniatigut naatsorsuutiginngisamik aningaasartuuteqarnerusoqarpoq, assersuutigalugu oqummut tunngatillugu aammalu inatsisitigut pisussaaffiusut soorlu siusinaartumik sulisinnaajunnaarnersiuteqartut utoqqalinersiaqartullu amerliartornerput.
Aasianni kommunip allaffia oquttoq siorna ukiup naanerani paasineqarpoq, tamannalu pissutigalugu allattoqarfimmi immikkoortut arlallit ininut allanut nutsertariaqarlutik.
- Isumaqarpunga una innuttaasunut apuutissallugu pingaaruteqartoq massakkut naatsorsuutiginngisatsinnik annertuumik pisoqarpoq – ingammik Aasianni oqummik eqquineq taanna massakkut innuttaasut malugereerpaat, Simigaq Heilmann oqarpoq.
Innuttaasunut sullissineq atuisoqarnerunerata malitsigaanik ajorneruleratarsinnaava?
- Innuttaasut taanna malugissagaat soorunami kissaatiginanngeqaaq. Kisianni ataatsimiititaliani aammalu politikkikkut pingaarnersiuinerit arlaatigut allannguuteqaratarsinnaanerat naatsorsuutigilluinnarpara, taanna tamatta kissaatigaarput, tassa akisussaassusilimmik ingerlatsissalluta aamma ataatsimiititaliap kommunalbestyrelsillu suleqqinnissaanut eqqartueqqissaagut.
Ataatsimut kissaateqarneq
Siumup kommunalbestyrelsimi gruppiani siulittaasup Aqqa Samuelsenip aningaasaqarnermi pissutsit ilungersunarluinnarlutillu ernumanarnerarpai.
Taassuma aningaasaqarnerup qanoq ingerlanerliulernera atuisoqarneruneranillu qanoq mumisitsisoqarsinnaaneranut iliuusissatut pilersaarut pillugu nalunaajaasoqarnissaa kissaatigaa.
- Isumaqarpunga una erseqqittumik oqaatigissallugu kommunalbestyrelsip tamarmiusup kissaatigaa iliuuseqartoqartariaqartoq aamma iliuusissat saqqummiunneqarput piffissallu ingerlanerani ataatsimiititaliamut saqqummiussinerit ingerlanneqartussaapput, Simigaq Heilmann oqarpoq, nangillunilu:
- Taamaammat uaniiginnanngilaq inummi ataatsimi ernumaneq kisianni kommunalbestyrelsip tamarmiusup aningaasaqarnitta ajunnginnerusumut sangutinnissaanut suliaqarnissaq taanna piumasarinikuuaa aamma nalunngilara allaffissornikkut suliarineqartoq.
