Inuit pingasut maqaasineqartut – SAR-imik suliaqarneq aallartinneqartoq
Inuit pingasut maqaasineqartutut ippassaq unnuap qeqqata missaani nalunaarutigineqarput. Inuit pingasut marlunngornermi Saqqamiit Qaarsunnukariartorlutik aallarput, sulilu tikinnatik.
Taamaammat Issittumi Sakkutooqarfiup Kalaallit Nunaanni Politiillu SAR-imik suliaqarneq aallartippaat, timmisartoq aamma umiatsiallu politiinik ilaasoqartut ujaasinermi atorneqarput.
Kalaallit Nunaanni Politiit sillimasut pisortaat ullaaq manna paasissutissiivoq. Taassumalu innuttaasut alaatsinaallutik ikiuunnissaannik qinnuigai.
Maqaasineqartut Poca 600 qaqortoq Mercurymik 225 hestekræftilimmik motoorilik atorlugu aallarsimasut, sillimasut pisortaata oqaatigaa.
- Maqaasineqartut takusimagaanni, imaluunniit maannakkut sumiinneri ilisimagaanni Kalaallit Nunaanni Politiinut 70 14 48-mut attaveqartoqarsinnaavoq.
- Inuillu maqaasineqartunik pingasunik alaatsinaannissaannik qinnuigerusuppagut, sillimasut pisortaat Jørgen Madsen oqarpoq.
