Air Greenlandip 100 millionit koruunit taamaatitsinernut kinguaattoornernullu aningaasartuutigigai

Silarluttarnera kingoraartissanillu amigaateqarneq Air Greenlandip 2022-mi timmisartuussineranut kinguaattoornerpassuarnik taamaatitsiinnarnerpassuarnillu kinguneqarpoq. Timmisartuutileqatigiiffik sullissinermini qulakkeerinninniarluni 100 millionit koruuninik aningaasartuuteqarpoq, aatsaallu taama aningaasartuuteqartigaluni.

Allattoq Mikkel G. Rasmussen

apriilip 21-at 2023 13:58

Nutserisoq Nathan Kreutzmann

100 millionit koruunit.

Taamaatitsiinnarnerit kinguaattoornerillu pissutigalugit Air Greenland 2022-mi ilaasunik sullissinermini taama aningaasartuuteqarpoq.

- Ingerlatsineq eqqarsaatigalugu ukioq 2022 tassaagunarpoq suliffeqarfiup oqaluttuarisaanerani ilungersunarnerpaasoq, tamannalu arlalinnik pissuteqarpoq, Air Greenlandip pisortaanera Jacob Nitter Sørensen KNR-imut oqarpoq.

Ukiup aallartinnerani covid-19 pissutigalugu Air Greenlandip timmisartuussinerani qaammatit siulliit pisarnermit ilaasukinneruvoq.

Aamma atuaruk Air Greenland teknikkikkut ajutooqqasoq: Ilaasut 106-it Upernavimmi kanngittut

Air Greenlandimmi timmisartuussinerani ilaasoqarnerusalernera ilutigalugu ajornartorsiutit allat takkupput.

Tassami 2022-mi silarloqattaarnerujussua kinguaattoornerpassuarnik taamaatitsiinnartariaqalernennillu kinguneqarpoq.

Aatsaat taama aningaasartuuteqarfiutigisoq

Sila pissutigalugu timmisartuussinissamik taamaatitsiinnartoqartillugu angalasut unnuinerat Air Greenlandimit akilerneqartarpoq, taakkununngalu Air Greenlandip 2022-mi 100 millionit koruunit aningaasartuutigai.

Aamma atuarukAir Greenland millionilikkuutaanit iluanaaruteqartoq

- Aningaasartuutit suliffeqarfimmut Air Greenlanditut mikitigisumut amerlaqaat, Jacob Nitter Sørensen oqarpoq nangillunilu:

- Angalasut unnuiffissaqartussaapput nerisaqartinneqassallutillu. Hotelinilu siniffiit amigarnerat pissutigalugu angalasut siniffissaqartikkumallugit Avannaaniit Kujataanut timmisartuussisariaqartarsimavugut.

AIR GREENLAND MILLIONILIKKUUTAANIK ILUANAARUTEQARTOQ

Air Greenlandip 2022-mi kaaviiaartitai 1,5 milliardit koruuniupput.

Akileraarutit peereerlugit ukiumi angusat 58,6 millionit koruuniupput.

Air Greenlandip timmisartuutaanut ilaasut 2022-mi 416.000-iupput. Taakku ukiup siulianut sanilliullugit 34 procentimik amerlanerupput.

Timmisartuussinerit katillugit 34.600-upput.

Silarluttarnera taamaatitsiinnarnerpassuarnik kinguaattoornernillu kinguneqarpoq, tamannalu Air Greenlandimut timmisartumut ilaasussat aallarneq ajuleqqasut ineqarnissaanut 100 millionit koruuninik aningaasartuuteqartitsivoq.

Air Greenland 2023-mi maajip aqqaneq-aappaani ataatsimeersuassaaq.

Allisiguk

2022-milu aningaasartuutit ukiut siuliinut sanilliukkaani aatsaat taama aningaasartuuteqarfiutigisoq takuneqarsinnaasoq pisortaaneq oqarpoq.

- Silarlunnera pissutigalugu unnuisitsinernut tunngasut marloriaat sinnerlugu aningaasartuuteqarfiunerulerput. Taamallu aningaasartuuteqartiginerput aatsaat misigaarput, taanna oqarpoq.

Isumatusaarnerunngitsoq

Angalasunik sullissinermik qulakkeerinninniarluni 100 millionit koruuninik aningaasartuuteqarneq isumatusaarnerunngilluinnartoq, Air Greenland ilisimatitsivoq.

- Aap, taamaappoq, Jacob Nitter Sørensen oqarpoq.

Aamma atuarukAir Greenlandip kanngittut kipiluttunartorsiorfigai

Siunissamilu taama aningaasartuuteqartiginissaq pinaveersaarniarlugu timmisartuutileqatigiiffik aaqqiissuteqarpoq.

- 2023-mi sullissineq aalaakkaanerutinniarlugu arlalinnik iliuuseqarpugut. Timmisartumik immikkut pisivugut, arlalinnik atorfinitisilluta sinerissamilu unnuiffiusinnaasut amerlinerunissaat sulissutigalutigu, pisortaaneq oqarpoq.