Air Greenlandip kanngittut kipiluttunartorsiorfigai

Ullumikkut marlunngornermi pissutsit ippassarniit atoruminarnerulaalerput, ippassarmi ilaasussat 1000-t Kangerlussuarmut kanngipput. Sila maanna erseqqinnerulermat sinerissami sumiiffinni amerlanerni Air Greenland timmisartuusseqqileraluartoq, Kangerlussuarmi suli pissutsit iluarsivinngillat.

Ilaasussarpassuit Kangerlussuarmi kanngittut ikiliartoraluartut, pissutsit taamaaginnarput.

Tassami Air Greenland timmisartorsuarmik Københavniliaassisussamik suli pissarsinngilaq, Københavniliartussallu utaqqeqqittariaqarput.

- Ilaasussarpassuit weekendtimi ippassarlu aallartussaagaluartut suli aallanngillat. Maannalu taakku qanoq ilillutik aallarnissaat sulissutigaarput, Air Greenlandimi PR manageri Inga Dora G. Markussen oqarpoq.

AAMMA ATUARUK SAS-imi suliumajunnaarneq: Apollop ilaquttaatalu timmisartoq ilaaffissaat taamaatiinnarneqartoq

Taanna nassuiaavoq, timmisartorsuit Europamiit attartorlugit Kangerlussuarmiit Københavniliartinnissaat maannakkuugallartoq assut ajornakusoortoq.

- Europami maannakkorpiaq timmisartorsuit pissarsiariuminaatsorujussuupput, maannakkorpiarlu attartugassaqanngilagut, tamannalu ilaasussanut pujoq pissutaalluni Kangerlussuarmi kanngittunut tuppoq, Inga Dora G. Markussen oqarpoq.

Pujoq nuissallu ajutoortitsipput

Sinerissap ilaani nuissat atsissumiittut pujorneralu, ingammik Nuup nalaani inunnik 1000-nik Kangerlussuarmi kanngitsitsipput, Air Greenland ippassaq taama nalunaarpoq.

Timmisartuussinissamut kinguaattoornerpassuit peqqutaallutik juuli tamaat sinerissami bilitsinik tuniniaanernik Air Greenlandip unititsisariaqalerneranik kinguneqarpoq.

AAMMA ATUARUK Timmisartumut ilaasussat 1000-ingajaat aallarsinnaanngitsut

Nunalli iluani ullumikkut timmisartuussinernut tunngatillugu tusarluartitsipput.

- Ullumikkut pujorunnaamillunilu qulisimajunnaamimmat sinerissami timmisartuussisoqassaaq, tamannalu ajunngilluinnarpoq, Inga Dora G. Markussen KNR-mut oqarpoq.

Taanna erseqqissaavoq, ilaasussat pineqartut tassaasut ullumikkumut bilitsissaqareersut, ullunili kingullerni aallanngitsoortunut bilitsissarsisitsinissaq suliassaangaatsiassaaq.

- Tamaviaarpugut, periarfissaqarniariarpat inissarsissutissavagut, oqarpoq.

Timersortarfik unnuiffissatut

Kanngittummi inuppassuit unnugu innarfissaqassappat?

- Mittarfeqarfiit suleqatigalutigu aaqqiiniarsarivugut. Kangerlussuarmili tamanna ajornakusoornerpaavoq, tassami inuppassuit ippassaq weekendtimilu suli utaqqipput, Air Greenlandimi PR manageri Inga Dora G. Markussen oqarpoq.

Taanna aamma oqarpoq nalunartut pillugit Kangerlussuarmi timersortarfik attartorsimagitsik, inissaaruttoqariataassappat nallarfigiartorneqarsinnaasutut.

Air Greenlandip nittartagaa naapertorlugu maannakkorpiaq allassimavoq, sila peqqutaalluni kinguaattoornerit juulip 15-ita tungaanut ingerlassasut.

Timmisartuutileqatigiiffiup maanna ilaasussat aallarfissaat allanngortiterniarsaralugit ulapputigai, ingerlaarfissallu allannguuteqaraangata piaarnerpaamik nutaamik aaqqiissuteqartarluni.