SAS-imi suliumajunnaarneq: Apollop ilaquttaatalu timmisartoq ilaaffissaat taamaatiinnarneqartoq
Apollo Mathiassen, nulianilu meeqqatillu sisamat nunarsuup kujasinnerusortaanut angalanissaat aajunaralaarsuugaluarpoq.
Københavnilli mittarfiani akitsuusigaanngitsumik pisiniarfeqarfinniitsillutik nuanninngitsumik sms-imik nassitsipput:
- Isumannaallisaalluni nakkutilliivikkoorluta timmisartoq ilaaffigisassarput suliumajunnaartoqalernera pissutigalugu taamaatiinnarneqartoq Spies-imit sms-isivugut, Apollo Mathiassen oqarpoq.
Ilaqutariit juulip ulluisa sisamaannit sapaatip akunnerani ataatsimi Spaniap illoqarfiani Malagamiittussaagaluarput. SAS-ip timmisartumilu aquttut akornanni isumaqatigiinniarnerit suliumajunnaarnermik kinguneqarsinnaanerat ilisimalluareerpaat.
AAMMA ATUARUK Takornarniat aqqutissaaruttut ilaat SAS-ip aaniarai
Aallarnissamulli ullussap tungaanut illuatungeriit isumaqatigiinnissaat ilimanartoq nutaarsiassaavoq. Taamaammat ilaqutariit Mathiassenikkut angalanissartik iluatsissasoq upperaat.
- Akitsuusigaanngitsunulli apuullutalu anganissarput unippoq, Apollo Mathiassen oqarpoq.
Malaga Sønderborgimik taarserneqartoq
Taanna ilaquttanilu Uummannap avannaanit nunaqarfimmit Saattunit sapaatip akunnera Spaniamiinniarlutik angalangaatsiarput.
Angalanerat meeqqami atuarnerminnik paarinnilluarnerannut minnerunngitsumillu angajulliup ilinniarnertuunngorneranut tunissutaavoq.
SAS-imit timmisartuunneqarnissat taamaatiinnarneqarpat pisinnaatitaaffitit suuppat?
SAS-ip nittartagaani ima allassivoq:
- Timmisartoq ilaaffissat SAS-imit taamaatiinnarneqarpat tamakkiisumik matumani kiffartuussinermut akiliutit, tamaatitsiinnarnermut akiliutit tapiliussallu ilanngullugit utertitsissaatit.
SAS-imik timmisartumik angallassinissat tamarmik taamaatiinnarneqanngillat. Taamaammat timmisartumut ilaanissat anganissamut periarfissamut allanut timmisartuutileqatigiiffimmulluunniit allamut nuutsinniarsinnaavat.
Tamatuma saniatigut timmisartumut ilaasut pisinnaatitaaffiannik illersugaavutit: Tassa imaappoq:
- timmisartoq ilaaffissat pilersaarutaasumit akunnernik marlunnik, pingasunik sisamanilluunniit kinguaattoorpat angalanissap ungasissusaa apeqqutaatillugu nerisassannik imigassannik akiliutitinnissat pisinnaatitaaffigaat.
- pisariaqarpat unnuinissamut mittarfimmullu angalanissamut akiliutitissinnaavutit.
SAS-imit angalanissat tamarmik taamaatiinnarneqanngillat. Tassunga taarsiullugu timmisartuutileqatigiiffinnit allanit tiguneqarput. Timmisartumik angalanissat tamarmik SAS-ip nittartagaatigut misissorsinnaavatit.
Paasissutissarsiffik: sas.dk, Forbrugerrådet TÆNK
Taamaammat allagarsinerup kinguneratigut pakatsisoqarpoq. Pingaartumik meeqqat pakatsingaatsiarput.
- Pakatsingaatsiarlutik qialaarput, oqarlutillu: ’Taavami maannakkut?’ ’Sussaagut?’
Akissutersinissaalu ajornakusoorpoq.
Mittarfimmimi paasissutissarsiassat annikitsunnguupput. Ilaqutariit tikittarfimmukarlutik pisattaminnik aalleqqinnassasut oqarfigineqaannarput. Mittarfimmi pisoqangaatsiarnera pissutigalugu akunnialunnik sivisussuseqarpoq.
Ilaqutariillu tassunga taarsiullugu timmisartumik kujasinnerusumut angalanissat allat misissorpaat. Akisungaatsiarpulli, inummut ataatsimut aqqut minnerpaamik 10.000 koruuninik akeqartussaavoq.
Taamaammat ilaqutariit Københavnimi akunnittarfimmut ullunut marlunnut inniminniigallarnissartik aalajangerallarpaat.
Tivolimukarlutillu allanik takusassaqqissunukarput.
Sønderborgimi feriertarfik
Ilaqutariit angalanissartik Sønderborgimi inissiamik feriertarfimmik inniminniiginnarput. Naallu spaniamiutut oqaasillit kiannerusorlu tikinngitsooraluarlugit sapaatip akunnerani ajunngitsoq, Apollo Mathiassen oqarpoq.
- Ajunngilluinnarpoq. Piffissaq ataatsimoorluta atorparput. Niviarsiaqqat ukiorpassuarni utaqqisimagamik pakatsilaaraluarlutik ilorrisimaalaalerput.
AAMMA ATUARUK SAS-imut ilaasussarpassuit timmisartut taamaatiinnarneqartut
Apollo ilaquttanilu SAS-imit timmisartumut Københavnimit Malagamut utimullu akiliutigisartik tigoqqippaat.
Taassumalu Europap kujataanut angalanissamut meeqqanut neriorsuutini eqquutsikkumaarlugu eqqarsaatigaa.
- Tunniutiinnanngilagut. Taamaammat immaqa aappaagu aallaqqikkumaarluta isumaqatigiippugut. Kisianni SAS-imut ilaallutaanngitsoq, Apollo Mathiassen KNR-imut oqarpoq.
Greenland Travelip takornariat Danmarkimit SAS-imut ilaasussat ajornartorsiornerat nalaatinngilaa.
Tamanna SAS-ip angalanissarpassuisa timmisartuutileqatigiiffinnit allanit tiguneqarnerannik pissuteqarpoq.
