SAS-imut ilaasussarpassuit timmisartut taamaatiinnarneqartut
SAS-imut ilaasussarpassuit sulinngiffeqarlutik pilersaarutaat, timmisartuussinissamut pilersaarutit timmisartumi aquttut suliumajunnaarnerat pissutigalugu taamaatiinnarneqarnerannik pissuteqartumik, isasooriaannaapput.
SAS-immi ilaasussanut aallarfissanik allanik nassaarniarnera ajornakusoortorujussuusoq, SAS Danmarkimi tusagassiuutinut pisortaq, Alexandra Lindgren Kaoukj oqarpoq.
- Tassani ajornartorsiuteqarpugut. Aasaanerani unammillernartoqangaatsiareermat periarfissat killeqangaatsiarput.
- Europami tamarmi silaannakkut angallanneq unammillernarpoq. Europami timmisartuutileqatigiiffiit tamarmik inissaqarnissaq unammillissutigaat. Taamaalilluni timmisartuutileqatigiiffinnik allanik ilaasussatsinnut nassaarniarneq killeqangaatsiarpoq.
Suliumajunnaartoqanerata ingerlanerani angallassinissat 200-init 250-inut ullut tamaasa taamaatiinnarneqassapput. Tamanna ilaasussanut ullormut 30.000-inut eqquissaaq.
- Timmisartumut ilaasussagut pillugu ulloq unnuarlu suliaqarpugut, Alexandra Lindgren Kaoukj oqarpoq.
Timmisartumut attartukkaniittut aallarneq ajuleqqasut apuukkusukkaat
Timmisartumut ilaasussat taamaatitsinerit pillugit SAS-ip nittartagaatigut paasissutissarsisinnaapput. Taakku aallarsinnaanngikkunik aningaasat utertissinnaavaat, imaluunniit namminneq allamik periarfissarsiorsinnaapput.
AAMMA ATUARUK SAS-ip pisortaanera: Timmisartortartullu isumaqatigiinniarnivut ajalusoormata suliumajunnaarput
Danmarkimi, Sverigemi Norgemilu timmisartuni aquttut sisamanngornermi suliumajunnaarput, taamaallaallu suliumajunnaarnerminni timmisartunut attartukkanut ilaasut aallarneq ajuleqqasut allanillu timmisartuni aqqutissaqanngitsut angerlamut apuussinnaanissaat neqeroorutigalugu.
Taakku SAS-ip timmisartuni aquttunik mattussijunnaarnissaanik piumasaqarput.
Aningaasatigut ilungersungaatsiartoq
Piffissami sivisuumi isumaqatigiinniartoqareerluni aaqqiagiinnginneq ataasinngornermi allartippoq.
SAS-ip coronamik nunarsuaq tamakkerlugu tuniluuttoqarnerata kingunerisaanik aningaasaqarnikkut ilungersungaatsiarneranik kinguneqarneranik tamanna pissuteqarpoq.
Tassungami atatillugu SAS-ip timmisartumi aquttut affai soraarsippai, atorfinitseqqinnissaanullu isumaqatigiissuteqarfigalugit.
Timmisartumi aquttut maanna ilorrisimaanngillat, SAS-immi ataani suliffeqarfiit SAS Link aamma SAS Connect aqqutigalugit timmisartumi aquttut nutaat pitsaannginnerusunik isumaqatigiissuteqarfigalugit atorfinitsippai.
- Isumaqatigiinniarpugut neriuppugullu timmisartumi aquttut uteqqissinnaassasut, taamaalilluta una naammassipallassinnaassallutigu, tamannami ilaasartutsinnut suliffeqarfiullu siunissaanut ajorsaataavoq, SAS-imi tusagassiuutinut pisortaq oqarpoq.
Timmisartumili aquttut SAS-imit tusagaqarnissartik utaqqiinnaraat, SAS-imi timmisartumi aquttut peqatigiiffiata Dansk Pilotforeningip ilaasortaaffigisaani, Dansk Metalimi isumaqatigiinniarnermut pisortaq, Keld Bækkelund oqarpoq.
- Piareersimavugut. Suliumajunnaarneq unitsillugu timmisartumi ilaasussagut timmisartuussinnaaleqqissavagut.