Takornarniat aqqutissaaruttut ilaat SAS-ip aaniarai

Takornarniat nunani allani aqqutissaaruttut tallimanngornermiit angerlartinniarlugit SAS-imi timmisartortartut nalunaarutigaat.

SAS-imi timmisartortartut Norgemi suliatigut peqatigiiffiata siulittaasua, Roger Klokset, Norgemi nutaarsiassaqartitsivimmut NTB-mut taama oqarpoq.

- Takornarniat sumiiffinni assigiinngitsuniittut aqqutissaarussimasut aaniarlugit timmisartut sumiiffinnukartinneqassapput, taanna NTB-mut oqarpoq.

Timmisartut 18-it takornaniat aqqutissaarussimasut aaniarlugit sumiiffimmukartinneqassasut, SAS nalunaarpoq.

Tamatuma saniatigut timmisartut allat sapaatit akunnerata naanerani aamma sumiiffinnukartinneqartussat qassiussanersut suli nalunartoq, SAS Danmarkip tusagassiinermut pisortaa Alexandra Lindgren Kaoukji ilisimatitsivoq.

AAMMA ATUARUK SAS-imut ilaasussarpassuit timmisartut taamaatiinnarneqartut

Timmisartut 100-t missaat sapaatit akunnerata naanerani sumiiffinnukartinneqassasut, siullermik ilisimatitsissutigineqarpoq. Tamannali eqquutitinneqassanersoq nalunarpoq.

- Sumiiffinnukutartitsisassanerluta ullormiit ullormut aalajangertassavarput, Alexandra Lindgren Kaoukji oqarpoq.

Timmisartut sumiiffinnukartinneqartussat siulliit Stockholmimukarlutillu Oslomukassasut, taakkualu ilaannanngui Københavniliassasut, SAS ilisimatitsivoq.

Danskit takornarniat aqqutissaaruttut aaneqassappata, Københavnip mittarfeqarfiata timmisartunut mekanikerii 200-t timmisartortartut tapersersorlugit aamma suliumajunnaartut ilaat suliumajunnaarunnaarnissaat pisariaqarpoq.

SAS-ip Københavnimi timmisartuisa ilarpassui aallinnginneranni ajunnginnersut timmisartunut mekanikerinit misissorneqaqqaartariaqartut, Alexandra Lindgren Kaoukji ilisimatitsivoq.

SAS-imi timmisartortartut aningaasarsiat pillugit isumaqatigiissusiortoqarsinnaasimannginnera pillugu suliumajunnaarput, tamannalu pillugu takornarniat nunani allani unittooqqallutik.