Timmisartumut ilaasussat 1000-ingajaat aallarsinnaanngitsut

Timmisartumut ilaasussat 1000-ingajaat nunatsinni sumiiffinni assigiiingitsuni aallarneq ajuleqqapput.

Taakku Air Greenlandimut ilaallutik sapaatip akunnerata naanerani angalasussaagaluarput, sineriammili pingaartumillu Nuummi ussissumik putsernera pujorneralu pissutigalugu ilaasussarpassuit aallanngitsoorput.

Taamaammat Air Greenlandip timmisartumut ilaanissamut angalaffissanik juulip sinneranut tuniniaanini maanna unitsippaa.

- Air Greenland piffissami matumani ajutooqqajaavoq. Kiffartuussiniarnitsinnik kiffartuussinngilagut, taamaammallu tuniniaanitsinnik unitsitsilluta matusisariaqarpugut, timmisartuutileqatigiiffimmi pisortaaneq, Jacob Nitter tusagassiuutinut nalunaarummi oqarpoq.

- Pujoq ussissumillu putsernera akornusersuingaatsiarnerat pissutigalugit ullormut pilersarutinik kinguartitsisariaqarpugut, tamatumalu ulluni arlalinni ajornartorsiortitsineragut ilaasussarpassuanngorput.

Nunatsinnilu sumiiffinni amerlasuuni tamaappoq.

Ilaqutariit Danmarkiliarnissaat ajutoortoq

Katrine Noahsen Gundel ilaquttanilu Ilulissaniipput. Taakku Danmarkimut ullumi aallartussaagaluarput - aallanngitsoorpulli.

- Puullaaqinarpoq soorunalimi aallaamanarluni. Tassami piffissaq eqqorlugu aallarusunnartorujuugami. Taavalu aamma ilaqutariittut feriaqatigiittussaangatta nukarlerlu assorsuaq qilanaarluni. Taanna pakatseqqavoq. Kisianni nassuiaappara, Katrine Noahsen Gundel KNR-imut oqarpoq.

- Ullaaq nalinginnaasumik aallartussaagaluaratta, timmisartussarpullu suli uninnani. Taava nuiajunnaariartornerani neriuuteqarnarluni aallartussanngorluta. Kisianni mittarfimmeeruttorluta timmisartussarput timminiarunnaartoq paaseriasaarlutigu.

Unnuiffissat amigaataasut

Dash 8-it amerlanerit Nuummi timmisartuusivimmiittarput. Ataaseq Ilulissani, tassanilu piffissami kingullermi pujorlunilu pujoq ussissuuvoq. Maannakkullu qatsoriartorpasinngilaq.

Ilulissanilu takornariaqarfiulluartartumi taanna kisimi ajornartorsiutaanngitsoq, Jacob Nitter paasissutissiivoq.

AAMMA ATUARUK Flypassager strandet og måtte selv sejle hjem, fordi Air Greenland ikke kunne hjælpe

Unnuiffissat aamma amigaataasut, taanna oqarpoq.

- Air Greenlandip timmisartumut ilaasussat unnuiffissaqarnissaat isumagai, tamannali aamma pilersaarusiornera unammillernangaatsiarpoq, pissutigalugu unnuiffiusinnaasut killeqangaatsiarput. Mittarfeqarfiillu suleqatigiiffigisatsinni suna tamarmi ilungersuanarpoq, pisortaq oqarpoq.

- Taamaammat timmisartumut ilaasussat nammagittarluarnissaannik kaammattuuteqarfigerusuppagut, sulisugummi unammillernartunut aaqqiissuteqarniarlutik ilungersorlutik suliaqarput, timmisartuussiniarneri ajornakusoorpoq, Jacob Nitter oqarpoq.

Angalanissanut nutaamik pilersaaruteqangajalersoq neriorsuisoq

Air Greenland pissutsit ilungersornartut pillugit nittartakkamini inoqatinut attaveqaasersuutini paasissutissiisassaaq. Timmisartumut ilaasussat angalanissaminnut pilersaarummik nutaamik amigaateqartut nassitsikkumaarput.

- Suleqatigut maanna katiterniagassangaatsiamik suliaqaleruttorput, ilaasussalli ernumassanngillat. Angalanissamut nutaamik pilersaaruteqalissaaq. Tamanna iluatsissappat sila, timmisartut timmisartumilu inuttat apeqqutaassapput, pisortaaneq oqarpoq.