Ilaasut namminneq umiatsiami angerlartariaqartut, Air Greenlandip ikiorsinnaanngimmagit

Uummannamiit Nuummut marlunngormat angalasussat Qaarsuni ikioriarfeeruppai. Ilaasut ilaat Qaarsuni ilaquttaminnik qanigisaminnik iserfissaqaratik silarluttumi angallammik ulorianartorsioqalutik angerlarniartariaqarsimapput.
Runa Nielsen ilaquttanilu Nuummut juunip 21-anili aasarsioriarlutik aallartussaagaluartut, ullorli taanna aallanngitsoorput. Assi © : Runa Nielsen
juunip 24-at 2022 15:56

Inuiattut ullorsioratta nunatta ilaa ullaap tungaani silaqqippallaanngilaq.

Runa Nielsen ilaquttanilu nuannaaqalutik Uummannamiit Nuummut aasarsioriartorlutik ullaaq taanna Qaarsunut aallarput.

Ullorli naatsorsuutiginngisaminnik, ilungersunartumik aqqusaagaqarfigalugu naavaat.

- Ulloqeqqata missaajunngikkunik kinguninngua ilisimatinneqarpugut timmisartoq Qaarsuarsunnut missinnaanngitsoq, Runa Nielsen oqarpoq.

AAMMA ATUARUK Kulusummiit ingerlariaqqinnaveertut erloqisut: Air Greenland iliuusai naammanngilluinnarput

Runa Nielsen Qaarsuni qanigisaminik iserfigeriannakkaminik ilaqutaqanngilaq. Ilaasullumi allat aamma ingerlariaqqissinnaanngitsut Uummannamut utertinneqassasut, Qaarsuni Air Greenlandip saaffiginnittarfiani sulisut ilisimatitsipput.

Tamannali aamma naatsorsuutaasutut inerneqanngitsoorpoq.

- Tullinnguulluta aallartussanngorlutalu sila erseqqarlussigami putserluni, siallerluni ilaatigullu aputinnguuttarluni, nillerluni, Runa Nielsen oqarpoq.

- Marluk qeqqata missaani paasitinneqarpugut helikopteri missinnaanngitsoq, taavalu akunnittarfik ulikkaaqqasoq sumiiffissaqanngitsugut, nammineerluta Uummannamut utertariaqassasugut.

Ulorianartorsiortut

Air Greenlandimi ilaasut angalanermi nalaani ingerlariaqqissinnaajunnaarunik, immaqaluunnit angalanissaat taamaatiinnarneqarpat, Air Greenland pisussaavoq ilaasuni isumannaatsumik unnuiffissaanik, nerisassaanik isumagissallugit.

Air Greenlandip kinguaattoornermut taamaatitsiinnarnermulluunniit maleruaqqusaani uani allassimavoq ilaasut taarsiiffigineqarnissaminnik pisinnaatitaaffeqartut.

Runa Nielsen uini paninilu 15-inik ukiulik Qaarsuniit Uummaannamut uternissartik namminneerlutik isumagisassanngoriasaarpaat.

- Angalanitsinnut attuumassuteqanngilluinnartut ilaquttagut piumaffigisariaqarnikuuagut ajornanngippat aalaarsinnaaneraatigut, oqarfigineqaratta tassa uternissarput nammineerluta isumagisariaqassagipput.

Ilaqutariit aatikkamik imaq mallingaatsialersimavoq, sila masannarluni. Aasarsiutinik atisaqaramik masalersimapput, silalu nillerluni.

- ikiniarsarigatta ilungersoqaagut pingaartumik panipput 15-inik ukiulik nangiartorujussuugami, majuartarfikkut utiinnangajattarluni, umiatsiamut tutineq sapilersoq. Umiatsiaq avalaqattaartoq mallernermut, pissitipajuusaannarlugu ikivarput.

- Paninnguara eqqarsaatigalugu umiatsiap avalaqattaartoq, ikeriarnerani umiatsiaq avalassimasuugaluarpat immamullu immaqa nakkarluni, paninnguara ilumut qaqeqqissanerlugu imaluunniit anaanaalluni ernumanarpoq annernarpoq.

Air Greenland ilaasuminut ikiuunnissaminik pisussaaffeqarput

Air Greenlandimi ilaasut kinguaattoorpata angalanissaalluunniit unitsiinnarneqarpat ikiorsiissutinik assigiinngitsunik pisussaaffeqarput.

Nunaqarfinnili mittarfilinni akunnittarfiit ulikkaarsimatillugit, iliuusissat assigiinngitsut periarfissaasarput.

Timmisartut qulimiguullilluunniit peqquteqarlutik angallassisinnaanngippata, taava angallatit inunnik ilaasoqarsinnaanermut akuersissutillit attartorneqartarput. 

Air Greenland sinerissami sumiiffinni amerlasuuni silamit ajornartoortinneqartarpoq, unnuisarfiillu ulikkaaraangata ajoraluartumik ilaasut namminneerlutik unnuiffissaminnik ujarlertariaqartarput. Tamanna naammaginanngilluinnarpoq, pingaartumik sumiiffinni ikittuinnarnik unnuiffissaqareersuni. Tamanna pingaartumik Qaarsuni aamma Kulusummi mittarfinni, Mittarfeqarfinnut isumaqatigiissuteqarfigisatsinni atuuppoq, Air Greenlandimi avammut attaveqaatilerisoq. Inga-Dóra Guðmundsdóttir Markussen oqarpoq.

- Aallartussanik taamaatitsigaangatta, ilaasunut eqqugaasunut sumiiffissanik nassaarniarluta sapinngisatsinnik sulisarpugut, naak tamanna pisussaaffiginngikkaluarlutigu. Kisianni nunami isorartoorsuarmi, silap assigiinngitsunik atugassaqartitsivigisaani aammalu angallavinni pisariusuni sullissiffigisatsinni najugaqaratta, ilaasutta sapinngisamik annikinnerpaamik persaqusersorneqannginnissaat anguniartarparput. 

Nunaqarfinni mittarfilinni assingusumik ajornartorsiorfiusartuni, aaqqiissutissanik pitsaanerusunik Air Greenland Mittarfeqarfiillu qanimut suleqatigiinnerullutik, siunissaq ungasinnerusoq eqqarsaatigalugu sulissuteqarlutik, KNR-imut paasissutissiipput.