Air Greenland millionilikkuutaanit iluanaaruteqartoq
Air Greenlandip 2022-mi kaaviiaartitai 1,5 milliardit koruuniupput. Tamannalu ukiup ingerlanerani suliaqartoqangaarsiarsimaneranut ersiutaasut, timmisartuutileqatigiiffik tusagassiuutinut nalunaarummi allappoq, nangillunilu:
- Naak ukioq annertuumik pisoqarfiugaluartoq, akileraarutit peereerlugit ukiumi angusat 58,6 million kronit siulersuisunit naammaginartinneqarput. Air Greenlandip suliffeqarfissuartut siunissamut, aamma 2022-ip kingorna, piareersimalluarnissaa annertuumik pingaaruteqarpoq.
Air Greenlandip timmisartuutaanut ilaasut 2022-mi 416.000-iupput. Taakku ukiup siulianut sanilliullugit 34 procentimik amerlanerupput.
Timmisartuussinerit 34.600-upput, timmisartumullu ilaasut 2019-imi nunarsuup ilarujussuata tuniluuttoqarnerata kingunerisaanik matoqqalinnginnerani amerlassusaata amerlaqatigingajappaat.
- Covid 19-ip kingorna silaannakkut angallannerup pissusissamisuuleqqinnera qularutissaanngilaq, ukiorlu qaangiuttoq aamma angallannerup tungaatigut siuariarfiulluni, pisortaaneq, Jacob Nitter Sørensen tusagassiuutinut nalunaarummi oqarpoq.
Sulisut nersualaarai
Air Greenlandilli siulersuisuisa siulittaasuata, Bodil Marie Damgaardip, 2022 “angallassinikkut ajornartorsiorfiusutut” taavaa.
Silarluttarnera taamaatitsiinnarnerpassuarnik kinguaattoornernillu kinguneqarpoq, tamannalu Air Greenlandimut timmisartumut ilaasussat aallarneq ajuleqqasut ineqarnissaanut 100 millionit koruuninik aningaasartuuteqartitsivoq.
Ukrainemi sorsunneq Covid 19-illu kinguneri kingoraartissanik pissarsiniarnermut aamma ajornakusoortitsipput.
Tamanna timmisartumut ilaasartunut annertuumik eqquillunilu suliffeqarfik tamaviaartippaa.
- Pissutsillu unammillernaraluaqisut Air Greenlandip sulisuisa tunniusimalluarlutik ilaasunik sullissilluartuarnerat assut ajasoorutigaara. Immikkorluinnarmi sullissisimapput, Bodil Marie Damgaard tusagassiuutinut nalunaarummi oqarpoq.
Angalasorpassuit timmisartorlu nutaaq
Tuukkaq, Air Greenlandip atlantikoq qulaallugu timmisartuussissutaa siorna decembarimi atulerpoq, aamma Billundimit Kangerlussuarmut aqqut nutaaq ammarneqarpoq.
Qulimiguullit nutaat tallimat aamma atulerput, tamannali ajornaatsuinnarmik ingerlanngitsoq, pisortaaneq, Jacob Nitter Sørensen oqarpoq.
- Aaqqitassat aammalu teknikerinik timmisartortartunillu ilinniartitsineq naammassippat, qulimiguullip piumasaqaatinik eqqortitsinissaa qularutiginngilarput.
Air Greenland 2023-mi maajip aqqaneq-aappaani ataatsimeersuassaaq.
