Air Greenlandip avannaani tunumilu qulimiguulimmik angallassinerit pitsanngorsarniarai

Tamanna nalunngilarput: Timmisartut imaluunniit qulimiguullit aallarfissaat taamaatiinnarneqartut, utaqqineq, uumisunneq, tikeraarniakkamullu kinguaattoorneq.

Timmisartuussinermi pissutsit ukioq manna ajornakusoorput, pingaartumik nunatta avannaani tunumilu innuttaasut ukiuni kingullerni eqqugaanerlunnerpaapput.

Tamannali suliniutit assigiinngitsut atorlugit pitsanngorsarneqassaaq Air Greenlandip pisortaanera, Jacob Nitter Sørensen aamma attaveqaasersuutinut naalakkersuisoq, Erik Jensen (S) ataatsimeereerlutik paasissutissiipput.

- Sila iliuuseqarfigisinnaanngilarput, kisianni teknikkikkut pissuteqarnerit sapinngisamik annikillisarneqassapput, Erik Jensen oqarpoq.

Air Greenland nunatta avannaani qulimiguullit pillugit ajornartorsiuterpassuaqarnikuuvoq.

AAMMA ATUARUK Qulimiguullit sukkanerugaluarlutik sermernartumi taartumilu timmisinnaanngitsut

Ajornartorsiutaasullu qulimiguullit teknikkikkut ajoquteqarneranni sillimmatissat anngunniarnerisa sivisuallaartarnerannik annertusineqartarput.

Nunatsinni sumiiffinni ataasiakkaani sillimmatissanik arlalinnik Europamit tikittunik uninngasoqalernissaa maanna pilersaarutaavoq.

- Qujanartumilli siornamit teknikkikkut ajutoornerit ikinnerungaatsiarput, kisianni sillimatissat tikiunniarnerat suli ajoraluartumik sivisusarpoq. Taamaammat tassunga atatillugu assartuinermut tassunga sapinngisarput tamaat iliorpugut, Jacob Nitter Sørensen oqarpoq.

Taassuma teknikkikkut ajutoornerpassuit uggorai, Air Greenlandili 2023-mi upernaamit sillimmataalertussamik qulimiguulimmik teknikkikkut ajutoortoqarnerani atorneqartartussamik pisisimasoq paasissutissiissutigaa.

Kulusummut Tasiilamullu mittoqarsinnaanissaanut atortorissaaruteqarnerussasoq

Aamma tunumi timmisartumut ilaasussat naammagittarluinnartariaqartarsimapput.

Tunumimi tarrajulluinnarnera qulimiguullit Tasiilamut minnissaannut unammillernartoqartitsivoq.

Mittarfeqarfiilli Tasiilami qulimiguulinnut mittarfiup qaammaqqusersorneqarluarnissaanut aningaasassarsivoq, Air Greenland taamaalilluni taartumi erseqqarinnginneranilu akunnerpassuarni missinnaallualerluni.

AAMMA ATUARUK Kullorsuarmioq er skuffet over nye helikoptere: Det bliver ikke meget anderledes

Mittarfeqarfinni aputaajaatinik sermiiaatinillu nutaanik pisinissamut aamma aningaasassarsisoqarpoq. Tamannalu pisariaqarpoq, Kulusummimi Tasiilamilu nunatsinni sumiiffinnut allanut sanilliullugu nittaannerusarlunilu nittaalartalimmik anorersuarnerusarpoq.

Erik Jensenip oqarnera naapertorlugu annaassiniarnissamut timmisartut tunumut apuunnissamut aamma periarfissagissaarnerulissapput.

- Timmisartukkut angallattoqarsinnaanerata pitsanngorsarneqarnerata saniatigut napparsimmavimmit timmisartuussinerit naammassineqarnissaannut aamma periarfissagissaarnerulissaaq. Suliniutit ataatsimut isigalugit ukiuunerani timmisartuussinermut aamma iluaqutaassapput.