Kullorsuarmioq qulimiguulik pillugu: Pakatsinaqaaq
Air Greenlandip ilaasunut angallassissutitut qulimiguulittaavi H155-it, taarsikkaminnit Bell 212-init sukkanerupput.
Taamaakkaluartorli timminerminni pitsaanerunngillat, siulitillu assigiinnarlugit. Tamanna Kullorsuarmi nunaqarfimmi aqutsisut siulittaasuata pakatsissutigaa.
- Taakkua atorneqartartut taarserneqalermata soorunami annermik avinngarusimasumiilluni qujanarnikooqaat. Kisianni aamma paasivarput taartumi sermernartumilu ingerlasinnaanngitsut. Pakatsinarpoq assut. Isumaqarpunga asuli akissaajartut, Beathe Petersen Greve oqarpoq.
AAMMA ATUARUK Qulimiguullit sukkanerugaluarlutik sermernartumi taartumilu timmisinnaanngitsut
Qulimiguullit nutaat taartumi sermertartumilu timmisinnaasut pisiarineqarnissaat akisuallaarput. Maanna pisiat arfinillit naliginut silarluttumi taartumilu timmisinnaasoq ataaseq taamaallaat pisiarineqarsinnaasoq, Air Greenland siusinnerusukkut paasissutissiivoq.
Pisoqqat, Bell 212-it, nalunaaquttap akunneranut 170 kilometeritut isorartutigisumukarsinnaapput, Nutaallu H 155-it 250 kilometerimut. Assersuutigalugu Upernavimmit Kullorsuarmukarnermi nalunaaquttap akunnera ataaseq minutsillu 15-nit atorneqartarnikut maanna minutsit 43-it atorlugit aqqut taanna timmiffigineqarsinnaalerpoq.
Kullorsuaq novembarip aallartinneranit februarip qiteqqunnerata tungaanut kaperlattarpoq. Taamaalineranilu qulimiguulimmit tikikkuminaatsinneqartarluni, ilaatigut qaammat ilivitsoq angullugu tikinneqarsinnaasarani.
Siulittaasoq: Allanngortoqarnavianngilaq
Timmisartuutileqatigiiffik naapertorlugu, qulimiguullit nutaat sukkanerunertik ilaatigut pitsaaqutigaat. Tamannali Kullorsuarmiup naammaginngilaa, silaannarmimi pisoqqat nutaallu piginnaasaat assigiipput.
- Una sukkanerulerneranut tunngasoq uanga naamik. Taamaattuartussaavoq oqaannaraani pissuseq una atugarput allanngornavianngilaq, Beathe Petersen Greve oqarpoq.
AAMMA ATUARUK Air Greenland qulimiguulimmik Upernavimmi eqqaanilu angallassinikkut ajornartorsiortoq
Kullorsuaq nunatsinni nunaqarfinni inuttunerpaanut ilaavoq. Nunaqarfimmi inuit 430-it missaat najugaqarput. Silaannakkullu angallannerup pitsanngunnginnera peqqissuseq eqqarsaatigalugu nuannarineqanngilaq.
- Naammangittarsinnaanngilagut, innutaasugut nalunngilarput soorlu assersuutigalugu maani peruluttoqarpat napparsimasoqarpat timmisartullu aanginnariaanngikkaa naamik uanga akuerisinnaanngilara, Beathe Petersen Greve oqarpoq.
Air Greenland ilaasunut angallassissutini qulimiguullit Bell 212-it taarserlugit H 155-inik arfinilinnik pisivoq. Pisiaq siulleq Upernavimmi atulereerpoq. Tullia Ilulissani qaammatip tulliata qiteqqunnerani atulissaaq, sinnerilu sisamat upernaaru aasarulu atorneqalissallutik. Sinneruttut sisamat Qaanaami, Uummannami, nunatta kujataani Tasiilamilu ilaasunik angallassissapput.