Air Greenland qulimiguulimmik Upernavimmi eqqaanilu angallassinikkut ajornartorsiortoq

Qulimiguulimmik ullut 45-t ingerlanerini pingasoriaannarluni angallassisoqarsimasoq, kullorsuarmiut ilaata oqaluttuaraa.
Upernavimmi eqqaanilu silap unerisimannginnera tarrullu ataani silaannakkut angallassinermik inerteqquteqarnermut maleruagassat silaannakkut angallassinikkut ajornartorsiortoqaneranut pissutaasut, angallannermilu pissutsit ukiortaamili taamaassimasut, Air Greenlandimit ilisimatitsissutigineqarpoq. Assi © : KNR
januaarip 16-at 2020 09:55

Air Greenland avannaani silaannakkut angallassinikkut ukioq aallartilaaginnartoq ajornartorsiorpoq.

Upernavik nunaqarfiilu qulimiguulimmik angallassinissanik kinguartitsisoqaqattaarneranik angalavissallu ullormut allamut nuunneqarnerannik eqqorneqarput, angallannermilu pissutsit ukioq naallugu taamaassimapput.

Qulimiguulimmik ullut 45-t ingerlanerini pingasoriaannarluni angallassisoqarsimasoq, Kullorsuarmi ilinniartitsisup, Kristian Florang Sørensenip, oqaluttuaraa.

- Kullorsuarmi kinguaattooqattaarnernik eqqugaavugut, tamannalu inuusuttorpassuarnut efterskoleminnut ilinniarfimminnullu utertussanut soorunami aamma sunniuteqarpoq. Eqqugaanitsinnik kinguneqartumik tarrup ataani silaannakkut angallassinermik inerteqquteqarnermut maleruagassat kinguaattooqattaarnerit pipput, Kristian Florang Sørensen oqarpoq.

AAMMA ATUARUK Strandede lærere giver problemer for bygdeskole

Kinguaattooqattaarnerit pissutigalugit ingerlariaqqissinnaanngitsoqarpoq, taakkualu Upernavimmi utaqqiisaasumik illusisimaffissaqartitaapput.

- Tassa imaappoq, Upernavimmiit ingerlariaqqissinnaanngitsut illuni assigiinngitsuni angallassinissaput tullianut  utaqqiisaasumik illusisimaffisaqartitaasarput. Ingerlariaqqissinnaasimanngitsut ilai ilaquttamaaratik Upernavimmi juullisiortariaqarsimasut Kullorsuarmut uteqqammerput, Kristian Florang Sørensen oqarpoq.

Silap unerisimannginnera maleruagassallu pissutigalugit kinguaattooqattaartut

Upernavimmi eqqaanilu silap unerisimannginnera tarrullu ataani silaannakkut angallassinermik inerteqquteqarnermut maleruagassat silaannakkut angallassinikkut ajornartorsiortoqaneranut pissutaasut, angallannermilu pissutsit ukiortaamili taamaassimasut, Air Greenlandimit ilisimatitsissutigineqarpoq.

Ingerlariaqqissinnaanngitsulli qassiunersut qasseriarlunilu kinguaattoortoqarsimanersoq, Air Greenlandip aamma oqaatigisinnaanngilaa.

Air Greenlandillu ajornartorsiornini qaqugu aaqqiivigisinnaanerini oqaatigisinnaannginnerarpaa, aaqqiiviginissaali sulissutigileruttornerarlugu.

- Upernaviup avannarpasissortaani silap unerisimannginnera tarrullu ataani silaannakkut angallassinermut inerteqquteqarnermut maleruagassat pissutigalugit tappavani silaannakkut angallassinikkut ajornartorsiorpugut, taamaattumik immikkut qulimiguuliisinnaanngilagut. Silaqqissinissaa utaqqimaartariaqarparput, silaqqisseriarpallu angallasseqqilerumaarpugut, Air Greenlandimi attaveqatigiinnermut pisortaq, Massana Egede, oqarpoq nangillunilu:

- Ingerlariaqqissinnaanngitsut ilai angalanissaat sisamanngornermut, arfininngornermut ilaalu januarip ulluisa 20-annut nuunneqarput.