Kinguaattoorneq atuarfimmut sunniuteqartoq

Kullorsuarmi ilinniartitsisut marluk nunaqarfimminnut aamma suli utinngillat, Air Greenlandillu kinguaattooqattaarnera atuarfimmut sunniuteqartoq, atuarfimmi pisortap tullia oqarpoq.
Allattoq Sara K. Jakobsen, Jonas Fievé
januaarip 16-at 2018 12:38

Air Greenlandip Upernaviup eqqaani angallassiniarnini ajornartorsiutigaa tamatumalu kinguneranik innuttaasut amerlasuut, taakkunannga Kullorsuarmi ilinniartitsisut marluk, ingerlariaqqissinnaajunnaarput.

AAMMA ATUARUK Napparsimmaviliarnissartik sivisuumik utaqqisariaqaraat

- Atuarfimmut sunniuteqaqaaq, pingaarnertulli atuartunut aamma sunniuteqarpoq, Kullorsuup Atuarfiani pisortap tullia Søren Greve oqarpoq.

Ilinniartitsisut Elias Petersen nulialu Inger Petersen juullisioriarlutik aallaramilli januaarip ulluisa tallimaani Kullorsuarmut tikittussaagaluarput, sulili nikeriaqqinngillat. 

Angummanniartut

Tamarmik ilinniarsimasuupput, aappaali atuartunut nukarlernut ilinniartitsisuni ilinniarsimasutuaammat atuartitsineq allatut aaqqissuunneqartariaqarsimavoq.

- Ilinniarsimanngitsunik ilinniartitsisuuteqarpugut atuartitsigallartunik, pikkorissuupput kisianni suliassaat angisoorujussuuvoq.

Kullorsuup atuarfiani atuartut 90-it missaanniipput, ilinniartitsisut ilinniarsimasut arfineq-pingasuupput ilinniarsimanngitsullu qulingiluaallutik.

AAMMA ATUARUK Avannaani timmisartuussiniarnerit suli ajornartorsiorfiupput

Ilinniartitsisullu marluk amigaataammata, atuartitsisut sinneri ulapinnerupput.

- Soorunami suliassaqaratta ilikkartitsiniaanissamik atuartitsinermillu ingerlataqartussaalluta. Taamaammat tikikkusunnarsivoq, Ilinniartitsisoq Elias Petersen oqarpoq.

Tikinnissaallumi atuarfiup aamma qilanaaraa:

- Suliassaqaraangatta pitsaasumik naammassiniartarpagut. Pitsaasumillu naammassisinnaanngikkutsigu atuartut atuartinneqarnerat sivikinnerussaaq. Taamaasiunngilagulli, nalunnginnatsigu aaqqiissutaagallartoq imminut illersorsinnaasoq, Kullorsuup Atuarfiani pisortap tullia Søren Greve oqarpoq.

AAMMA ATUARUK Issittumi sakkutooqarfik ilaasut apuunnissaannut ikiuuttoq

Upernavimmut nunaqarfiinullu qulimiguulimmik angallassinerit Air Greenlandip aaqqiiviginialerlugit, timmisartortitseqatigiiffimmi niuernermut pisortaq Maliina Abelsen ataasinngornermi oqaatigaa.

Kullorsualiartussat ingerlariaqqissinnaajunnaartut Issittumi Sakkutooqarfiup qulimiguuliutaa S-61 atorlugu ualeq manna apuussorneqassasut, Air Greenland ullumi marlunngornermi allappoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk