Napparsimmaviliarnissartik sivisuumik utaqqisariaqaraat

Angalasut Upernaviliartut Upernavimmiillu aallartussat decembarip qaammataanili suli ingerlariaqqinngillat.

Air Greenlandip qulimiguulimmik angallassinini decembarimili assut ajornartorsiutigaa.

Angalasut 57-it Upernaviup nunaqarfiinit Kullorsuarmit Nuussuarmiillu ingerlariaqqissinnaanngillat. 

AAMMA ATUARUK Air Greenland qulimiguulinnik nutaanik pisisariaqarpoq

Kullorsuarmiup Jørgen Adam Fiskerip panini decembarip ulluisa 28-anili Upernaviup napparsimmavianukaattussaagaluarpaa, angalanissaalli kinguaattoortuarsinnarpoq.

- Soorunami naammagittaalliornarpoq, uaguinnaanngitsoq, Upernaviup eqqaani aamma allanik eqqugaasoqarpoq, Jørgen Adam Fisker oqarpoq.

Napparsimmaviliartariaqartulli arlaqartut, taassuma oqaatigaa. Kullorsuarmiit nunaqarfinnillu allanit Upernaviup napparsimmavianut ingerlariaqqissinnaanngitsut allat KNR-imut aamma saaffiginnipput.

AAMMA ATUARUK Angalasut ingerlariaqqissinnaanngitsut apuuttussanngortut

Silalli ajornera teknikkikkullu ajornartorsiuteqarneq pissutigalugit taakku aamma angallanneqarsinnaanngillat.

- Kipiluttunalaarpoq, ingammik napparsimasut allat eqqarsaatigalugit. Taamaaginnassappammi aarlerinartoqarpoq.

Neriuuteqaleraluartut

Air Greenlandip sapaatip akunnera kingulleq neriorsuutigaa angalasut ingerlariaqqissinnaanngitsut ornitaannut sapaatip akunnerani tassani anngunneqassasut.

- Soorunami neriuleraluarpugut, isumaliorluta S-61-iluunniit siornatuut atorneqarnialersoq, Jørgen Adam Fisker oqarpoq.

AAMMA ATUARUK Helikopterproblemer i Nordgrønland fortsætter

Air Greenlandilli neriorsuutini eqquutsinngitsoorpaa, angalasussarpassuimmi suli ingerlariaqqinngillat. Air Greenlandip sila ajornera pissutigalugu pilersaarutini piviusunngortissinnaasimanngilai.

Angalasussat Upernavimmeersut eqqugaasut katillugit 127-upput.