Angalasut ingerlariaqqissinnaanngitsut apuuttussanngortut

Angalasut arlallit decembarimili Nunatta avannaanit ingerlariaqqissinnaasimanngitsut, kiisami ornitaminnut apuussinnaanngulerput. Air Greenland tusagassiuutinut nalunaarummi taama allappoq.

Angalasut arlallit Upernavimmit ingerlariaqqissinnaanngitsut KNR-imut saaffiginnissimapput. Taakku angalatsiviup Namminersorlutik Oqartussanit pigineqartup qulimiguulianik ingerlariaqqissinnaannginnertik nukillaajallaatigisimavaat.

Air Greenlandip KNR-imut allakkatigut nassuerutigaa, ingerlatitseqatigiiffik decembarimili ingerlatsinerup tungaatigut killiliiffigineqarsimasoq; siullermik sila peqqutigalugu kingornalu teknikkikkut ajornartorsiuteqarneq pissutigalugu.

Ingerlatseqatigiiffik naapertorlugu angalasut Upernaviliartut Upernavimmiillu aallartussat katillutik 69-it utaqqisut. Eqqorneqarnerlunnerpaapput Upernaviup, Nuussuup Kullorsuullu akornanni angalasut, Upervimmiillu aallartussat Upernaviliartullu 33-it aamma suli utaqqisut.

Timmisartortitseqatigiiffilli maanna neriorsuivoq qulimiguulimmik ullumimiit sapaatip akunnerata naanissaanut angalasut tamaasa ornitaannut anngunniarlugit.