Avannaani timmisartuussiniarnerit suli ajornartorsiorfiupput
Ilaasussat arlallit decembarip qiteqqunneraniilli unittooqqapput. Pingaartumik Upernavimmit Upernavimmullu ilaasussat ingerlariaqqissinnaajunnaaqqapput.
Silap ajornera aallaqqaammut ajornartorsiutaavoq, timmisartuussisoqarsinnaalermallu teknikkikkut ajornartorsiortoqalersoq Air Greenlandip nalunaarutigaa.
Sapaatip-akunnerata massuma ingerlanerani timmisartuussisoqarniartoq, Air Greenlandip pingasunngormat nalunaarutigaa.
AAMMA ATUARUK Angalasut ingerlariaqqissinnaanngitsut apuuttussanngortut
Pilersaarutilli taakku silap ajornera pissutigalugu piviusunngortinneqarsinnaasimanngillat. Air Greenland taama nalunaaruteqarpoq.
Ilaasussat 130-t unittooqqasut timmisartuutileqatigiiffiup nalunaarutigaa, pingasunngorpallu aatsaat angallanneqarsinnaassagunartut nalunaarutigaa.
- Ajuusaarnaqaaq, ilaasussalli naammagittaannartariaqassapput. Qulimiguullit amerlanerit timmisartuussisinnaanissaat periarfissarsioraluarparput iluatsissinnaasimanaguli, Air Greenlandip tusagassiinermut pisortaa Kathrine Hjelholt Nathanielsen oqarpoq.
Ataasinngornermi marlunngornermilu timmisartuussisoqarsinnaanngippat ilaasussat ingerlariaqqissinnaajunnaartut amerlissasut Air Greenlandip nalunaarutigaa, ilaasussallu apuuffissaminnut ullut arfineq-marluk qulillu akornanni apuussinnaanissaat naatsorsuutigineqarpoq.
Pissutsit Air Greenlandimit nakkutigineqartut, timmisartuutileqatigiiffiup nalunaarutigaa, periarfissaqalerpallu piaarnerpaamik timmisartuussisoqalerumaartoq nalunaarutigalugu. Ilaasussat emailikkut, SMS-ikkullu oqarasuaatikkulluunniit tamanna pillugu attavigineqarumaarput, apeqqutissaqaraannilu Air Greenland Call Centeri 70 12 12-imut sianerluni attavigineqarsinnaavoq.
