Borgmesteri: Air Greenland qulimiguulinnik nutaanik pisisariaqarpoq

Air Greenlandip decembarili qaammataagaa Nunatta Avannaani qulimiguulimmik angallassinini assut ajornartorsiutigisimavai.

Tamatuma kinguneranik innuttaasut amerlasuut ingerlariaqqissinnaajunnaarsimapput. Timmisartortitseqatigiiffik tallimanngornat nalunaarpoq angalasut 130-it pineqartut.

Avannaata Kommuniani borgmestrip tamanna assut naammagittaalliutigaa:

- Juullinngitsorli Upernaviup eqqaani nunaqarfimminni juullisiorniarlutik angerlarniaraluit ullumikkumut suli apuussimanngillat. Pissutsit taamaanneri ullutsinnut naleqqutinngilluinnarput Air Greenlandillu qulimiguuliisa nunaqarfiliartaataasa nutartertariaqalersimanerannut takussutissiisuullutik, borgmesteri ataasinngornermi  tusagassiuutinut taama allappoq.

AAMMA ATUARUK Helikopterproblemer i Nordgrønland fortsætter

Kingullermik pingasunngormat timmisartortitseqatigiiffik nalunaarpoq sapaatip akunnerata naanissaanut timmisartuussisoqarniartoq. Pilersaarulli taanna piviusunngunngitsoorpoq, aatsaallu sapaatip akunnerani matumani pingasunngornermiit timmisartuussisoqassagunarluni.

Air Greenland naapertorlugu ajornartorsiutinut ilaatigut sila teknikkikkullu ajutoornerit pissutaapput.

AAMMA ATUARUK Angalasut ingerlariaqqissinnaanngitsut apuuttussanngortut

Taamaattumik Avannaata Kommuniani borgmesteri isumaqarpoq ajornartorsiutit aaqqinniarlugit Air Greenland qulimiguutinnik pitsaanerusunik pisaartariaqartoq:

- Matumuuna Air Greenland nunatsinnilu naalakkersuisut sakkortuumik kaammattorpakka piaartumik Air Greenlandip qulimiguuliisa naleqqussarlugit taarsersornissaat sulissutigeqqullugit, Palle Jerimiassen taama allappoq.

AAMMA ATUARUK Uummannami angalasussat 100-t qulimiguullip ajornartorsiuteqarneranit eqqugaasut