Uummannami angalasussat 100-t qulimiguullip ajornartorsiuteqarneranit eqqugaasut
Uummannami qulimiguulik ataasinngormat teknikkikkut ajornartorsiuteqalerpoq, silassarlu malillugu kingoraartissat aatsaat tallimanngorpat tikinnissaat naatsorsuutigineqarpoq. Tamatumalu malitsigisaanik ilaasussat 100-t eqqugaassapput.
Air Greenland taama nalunaaruteqarpoq.
Ilulissaniit Uummannamut qulimiguulik alla atorlugu kingoraartissanik tikisitseriaraluartoqarpoq, silarlunnerali peqqutigalugu qulimiguulik uterpoq.
Aamma Uummannami eqqaanilu ilaasunik imaatigut angallassinissamut periarfissat misissuiffigineqarput.
Angallatilli minnerit piffissami matumani angalasinnaanngillat, sumiiffimmilu angallatinik anginerusunik ilaasoqarnissamut akuerisanik peqarani.
Ilaasussat tamarmik kingusinnerpaamik ullumi nal. 14.00 angalanissamut pilersaarummik iluarsisamik pissarsinissaat Air Greenlandimit sulissutigineqarpoq.
