Air Greenlandip imarpik qulaallugu timmisartorsua ajutoornermi kingorna timmisartuusseqqissinnaalersoq
Air Greenlandip timmisartorsua Tuukkaq kingoraartissanik amigaateqarnera pissutigalugu ulluni 19-ini uninngavoq.
Teknikerit kingoraartissat tallimanngornermi unnukkut kingusissukkut pissarsiaraat, timmisartorsuarlu sapaatit akunneri pingasungajaat nunamiiginnareerluni ullumi nunatta tungaanut ingerlaarpoq. Air Greenland Facebookimi quppernermini paasissutissiivoq.
Ajutoorneq maajip ulluisa 23-anni pivoq. Tassami Københavnimi sullissiviup Aviatorip Air Greenlandimit atorneqartup timmisartorsuaq uniartillugu aportippaa, taamaalillunilu timmisartorsuup sulua talerperleq ajoquserluni.
Ajutoornermi timmisartorsuup suluusaani aqorlermi sangusaat taarserneqartariaqalerluni ajoquserpoq. Sangusaammilli taarsiiniaq kingoraartissanik pissarsiniarnerup ajornakusoornera pissutigalugu sapaatinik akunnernik pingasunik sivisussuseqarpoq.
Taamaammat Air Greenlandip teknikerii kingoraartissanik tallimanngormat unnukkut pissarsigamik suliaqapallapput, Air Greenlandillu teknikkeqarnermut pisortaata timmisartorsuaq piareertoq sapaatiummat nalunaarutigaa.
Timmisartorsuup Tuukkap Københavnip mittarfiani uninnganerani Air Greenland timmisartumik attortorpoq, taannalu imarpik qulaallugu timmisartuussissutaalluni.
