Air Greenlandip timmisartorsua Københavnimi ajoqusertoq

Københavnip mittarfeqarfiani ajutumeerneq Københavnip nunattalu akornanni ulluni tulliuttuni timmisartuussinissanut sunniuteqarataannaavoq.

Air Greenlandip timmisartorsua Københavnip mittarfeqarfianut mereerluni ilaasuilu tamarmik nioreersullu Aviatorimeersunit, tassa mittarfeqarfimmi ingerlatsinermik akisussaaqataasumit, kalitsilluni ajutumeerpoq. 

Air Greenlandip attaveqatigiinnermut pisortaa, Kathja Vahl, taama ilisimatitsivoq. 

- Timmisartorsuup kalinneqarnerani SAS-ip timmisartuata suluanut aporami ajutumeerpoq, taanna oqarpoq.

Timmisartorsuup ajoqusernerani inunnik ajoqusertoqanngitsoq taavalu Air Greenland timmisartulioqatigiiffillu Airbus timmisartorsuup iluarsaatilertornissaanik suleqatigiittut, Kathja Vahl ilisimatitsivoq.

Timmisartorsuaq ajutumeerujussuanngikkaluartoq arfininngornerup tungaanut timmisartuussissutaajunnaarallartoq tamatumalu kingorna timmisartuussissutaaqqilersinnaanissaa neriuutigigitsik, Katja Vahl oqarpoq.

Kingoraartissarsiortoq

Billundip nunattalu akornanniinnaq ullumi pingasunngornermi timmisartuussisoqassammat ajutumeerneq ullumi ullunilu tulliuttuni timmisartuussinissanut allanut sunniuteqarnavianngitsoq, Katja Vahl oqarpoq.

Timmisartuussinissanik taamaatitsinissaq ingalassimaniarlugu Air Greenland aqagu sisamanngornermi aallartussanik timmisartuussissutigisinnaasaminik kingoraartissarsiniapiloortoq, Katja Vahl ilanngullugu ilisimatitsivoq.

- Sisamanngorpat, tallimanngorpat immaqalu arfininngorpat timmisartuussissutigisinnaasatsinnik kingoraartissarsiorpugut, taanna oqarpoq.

Taamaammat timmisartorsuup ajutumeernera ulluni tulliuttuni timmisartuussinissanik kinguartitsisariaqarnermik kinguneqassangatinngikkini, taanna oqarpoq. Taassumali ulluni tulliuttuni angalasussat qanoq pisoqarnissaanik malinnaanissaannut kajumissaarpai.

- Allannguingaatsiassagutta soorunami nalunaarfigissaqqaarpagut, angalasussalli qanoq pisoqarnissaanik malinnaanissaannut kajumissaarpavut, Katja Vahl oqarpoq.