Majuartarfiit Air Greenlandip timmisartuanut aportut – sivikinnerpaamik sapaatip akunnera uninngassasoq
Air Greenlandip atlantikoq qulaallugu timmisartuussissutaa Kangerlussuarmi biilimik majuartarfinnik ingerlatsisumit marlunngornermi, nalunaaqutaq marlunngunngitsiartoq aporneqarpoq.
Timmisartoq ajoqusingaatsiarpoq, tamanna pissutigalugu timmisartoq sivikinnerpaamik sapaatip akunnera angalasinnaassanngilaq. Air Greenlandip avammut attaveqaatilerisua, Inga Dora Guðmundsdóttir Markussen KNR-imut oqarpoq.
- Timmisartoq 210-nik ilaasoqarluni ullumi aallartussaagaluarpoq, taakkulu aallanngitsoorput. Timmisartumik allamik pissarsiniarsarivugut, Inga Dora Guðmundsdóttir Markussen oqarpoq.
Timmisartumulli ilaasussat qaqugu aallarsinnaanissaat Air Greenlandip oqaatigisinnaanngilaa.
Inga Dora Guðmundsdóttir Markussenilli ajutoortoqarnera atlantikoq qulaallugu timmisartuussinissamut kisimi eqquisoq oqaatigaa.
- Piffissamut tassunga timmisartup ajorneranut timmisartumik allamik atulersitsiniarsarivugut. Timmisartumi sisamanngornermut tallimanngornermullu iluatsitsivugut, kisianni timmisartumik aqagumut atortussamik suli pissarsiniarsarivugut, taanna oqarpoq.
Taamaammat ilaasussat inissaqartillugu Kangerlussuarmi unnuisariaqassapput.
- Kangerlussuarmit Nuummut unnugu timmisartuussissaagut. Unnuiffissat amigarnerat pissutigalugu ilaat Kangerlussuarmit aallartittariaqarpagut, Inga Dora Guðmundsdóttir Markussen oqarpoq.