Air Greenland: Timmisartup assakaasulerfii ajoquteqanngillat
Timmisartoq Ilulissaniit tallimanngormat Kangerlussualiartoq miliiveruttorluni qangattaqqittariaqarsimavoq. Timmisartummi assakaasulerfiata aappaa nuisimannngimmat timmisartup assakaasulerfii ilaasut ajoquteqarsorisimavaat.
Timmisartulli assakaasulerfii ajoquteqanngitsut, timmisartuutileqatigiiffiup Air Greenlandip timmisartortartuisa pisortaat, Henrik Maule Steinbacher, timmisartuussinermi nalunaarsukkat misissoqqissaareerlugit uppernarsaavoq.
- Timmisartup assakaasulerfii ajoquteqanngitsut qularnaaqqissaarparput, taanna oqarpoq.
Timmisartullu assakaasulerfii ajoquteqanngitsut, timmisartortartut tallimanngormat timmisartuussinerminni paasigamikku ilaasut annilaarsimaqisut højtalerikkut nalunaarfigereeraallu, timmisartoq minnissamut apparsariarluni ajornaquteqanngitsumik mippoq.
Tallimanngormat timmisartuussinermi nalunaarsukkat timmisartup assakaasulerfiisa ajoquteqannginnerannik qularnaarinerminni tunngavigilluinnarsimagitsik, Air Greenland nalunaarpoq:
- Timmisartuussinermi taama pisoqaraangat qularnaagassaq ataasinnaasanngilaq. Timmisartoq taama pisoqarneranik pingasunik kalerrisaarinasuaateqarlunilu tamatuma saniatigut tallimanik allanik aamma kalerrisaaruteqarpoq, Henrik Maule Steinbacher oqarpoq.
- Timmisartup assakaasulerfii ilumut ajoquteqarnersut soorunami aamma misissorpavut. Ajoquteqanngitsullu qularnaaqqissaarparput, taanna oqarpoq.
Periusissamissut sillimasartut
Timmisartortartut periusissamissut sillimaqqissaarlutik qangattaqqeqqaariarlutik Kangerlussuup mittarfia qulaavaateriarlugu mipput.
- Air Greenland periusissaminik malinnittuaannarpoq, aamma timmisartuussinerni. Nalorninartoqarneraasoqaraangat pinartoqarneraasoqaraangalluunniit nangaarianngiivilluni aalajangiilertortoqartarpoq.
Tallimanngormallu timmisartuussisut aalajangernerat inissaminiilluinnartoq, timmisartortartut pisortaat Henrik Maule Steinbacher oqarpoq:
- Tallimanngormat timmisartuussinermi pisoq inuttanut sungiusarneqarnermisulli iliorluinnarsimasunut kinguneqarnavianngilaq. Assingusumik nalaataqaqqissagaluarutta asseqqissaavanik iliorumaarpugut.
Ilaasunut attaveqarneq nalilersoqqinniaraat
Tassa tallimanngormat timmisartuussinermi pisoq inuttanut kinguneqarnavianngikkaluartoq assingusumik pisoqaqqerataannaanissaanut sillimaniarlutik periusimik ilaat allanngortinniaritik, Air Greenlandip attaveqatigiinnermut pisortaa Katja Vahl ilisimatitsivoq:
- Tallimanngormat timmisartuussinermi ilaasuvut pisup kingorna paasissutissinnerusimasinnaagaluarivut qularinngilarput. Ilaasummi ilaat toqqissiviilliorsimaqisut nalunanngilaq. Tamanna soorunami pimoorullugu qanoq iliuuseqarfigissavarput, taanna oqarpoq nangillunilu:
- Tamanna tusaatissatut soorunami tiguarput. Taama pisoqarsimatillugu pisup kingorna paasissutissiilluarnerusarnissarput pisariaqarpasippoq. Ilaasut oqaloqateqarnissamik pisariaqartitsisortaqarpata attavigisinnaakutsoorpaatigut. Oqaloqatiginissaammi soqutigilluinnarparput.