Tasiilami Alivarpimmi ilinniartitsisut sinniisaat: Ilinniartitsisut aqutsisullu akunnerminni aaqqiagiinngissuteqarput
Tasiilami Alivarpimi aqutsisut ilinniartitsisullu suleqatigiittarnerat akimmisaarfeqartuartarpoq.
Ukioq atuarfiusoq aggustimi aallartimmalli ilinniartitsisut qulit maannamut soraareerput. Wilhelm Olsen Tasiilami Alivarpimmi ukiunik pingasunik sinniisutut atuuffeqarpoq. Ilinniartitsisut aqutsisullu iluminnik suleqatigiinniarnermikkut aaqqiiaginngissuteqartut, taassuma oqaatigaa.
- Soraarniuteqartorpassuit aqutsisunut suleqarniarnermikkut aaqqiagiinngissuteqarput, taanna oqarpoq itisiliillunilu:
AAMMA ATUARUK Tasiilami Alivarpimmi pisortaq suliunnaarsinneqarallartoq
- Sulisut aqutsisullu suleqatigiinniarnermikkut iluminni silaannaat nuanninngitsumut killittarpoq.
Tasiilami Alivarpimmi pisortaq, Jørn Holbech misissuisoqarnerani atorfimminit tallimanngornermi suliunnaarsinneqarallarnera sioqqullugu Wilhelm Olsen KNR-imiit apersorparput.
Sunarpiaq pillugu misissuisoqarnersoq Kommuneqarfik Sermersuumi atuarfeqarnermut immikkoortortaqarfimmit oqaatigineqanngilaq.
Jørn Holbech KNR-imiit attaveqarfigaarput, taannali suliamut tunngasumik oqaaseqarusunngilaq.
Kommuneqarfik Sermersuumi attaveqaqatigiinnermut immikkoortortaqarfik suliunnaarallartitsinermut tunngasumik oqaaseqarumanngilaq, inunnut ataasiakkaanut tunngasussunnera innersuussutigalugu.
Suanngassisarneq
Tasiilami Alivarpimmi ilinniartitsisussaaleqineq
- Tasiilami Alivarpimmi sulisut 62-iupput taakku pingajorarterutaat timelæreriupput.
- Tassa imaappoq, Tasiilami Alivarpimmi sulisut pingajorarterutaat ilinniartitsisutut ilinniarsimanngillat, pingajorarterutaallu Danmarkiminngaaneersuullutik.
- Tasiilami Alivarpimmi ilinniartitsisut ilinniarsimasut 22-t amigaatigineqarput.
Wilhelm Olsenip oqarnera naapertorlugu Tasiilami Alivarpimmi ilinniartitsisut aqutsisullu akornanni siornali ajornartorsiuteqalerput. Ajornartorsiutillu ilaagaat atuarfimmi pisortaq sulisunut suangalluni pissusilersortanera.
- Ataatsimiinnermi pisortap nipini sakkortusisinnaasapaa, sukangarpaluttumik. Aatsaavissuaq pisortamik taamaattumik naammattuuigama oqaluttuariuminaatsorujussuuvoq qanorpiaq oqaatigissanerlugu. Kisianni tassa ataatsimiinnermi nuanninngitsumik sunniuttartumik pisoqartaramik.
Tasiilami Alivarpimmi ajornartorsiutinut tunngatillugu ilinniartitsisut sinniisaat siorna novembarimi Kommuneqarfik Sermersuumi atuarfeqarnermut immikkoortortaqarfimmut saaffiginnissuteqarpoq.
- Siorna novembarimi Nuummiinninni sinniisutut oqaluussivugna. Oqarlunga iliuuseqartoqanngippat ilinniartitsisorpassuarnik annaasaqarnissamut killilerpugut. Ullumikkut sulisut qulit soraareerput.
Ilinniartitsisut kattuffiat IMAK KNR-imiit aamma attaveqarfigaarput. Suliamullu tunngatillugu taanna oqaaseqarusunngilaq. Kattuffiup siulittaasuat, Elna Heilmannip Kommuneqarfik Sermersuutulli inunnut ataasiakkaanut tunngasunut oqaaseqarusunngillat.
Ilinniartitsisut ilinniarsimasut 22-t amigaatigineqartut
Jørn Holbech Tasiilami Alivarpimmi marloriarluni atorfeqarpoq – 2006-imiit 2014-imut. 2020-p aasaanerani atorfimmut uteqqippoq.
Qaammatip siuliani Jørn Holbech, tunumi ilinniaritsisussaaleqineq pillugu KNR-imiit apersornikuuarput. Tassalu Tasiilami Alivarpimmi ilinniartitsisut 62-iusut pingajorarterutaat timelæreriupput. Tamanna isumaqarpoq ilinniartitsisut pingajorarterutaat ilinniarsimanngillat, pingajorarterutaallu Danmarkiminngaanneersuullutik.
Tasiilami Alivarpimmi ilinniartitsisut 22-t ilinniarsimasut amigaatigineqarput.
- Ilinniartitsisut atuartullu akornanni agginngitsoqartaqaaq. Atuartullu atuariartunngitsoortut arlaqaqaat. Ilinniartitsisussaaleqilluni ajornartorsiutit taama amerlatigisut passukkuminaapput, Jørn Holbech KNR-imut oqarpoq.