Tasiilami Alivarpimmi pisortaq suliunnaarsinneqarallartoq

Tasiilami Alivarpimmi pisortaq, Jørn Holbech, misissuisoqarnerani suliunnaarsitaagallarpoq.

Tasiilami Alivarpimmi sinniisoq KNR-imut taama ilisimatitsivoq.

Tasiilami Alivarpimmi pisortap suliunnaarsinneqarallarneranut tunngatillugu Kommuneqarfik Sermersuumi atuarfeqarnermut ingerlatsivimmut KNR-imiit uppernarsartinniaraluarparput. Inunnut ataasiakkaanut oqaaseqarsinnaanatik taakku ilisimatitsipput. Taamaammallu uppernarsaasinnaanatik.

Tasiilami Alivarpimmi ilinniartitsisut qulit aggustimiilli atorfimminniit soraarnikuupput.

Atuarfimmi ilinniartitsisuusimasut arlaqartut KNR-imiit oqaluuppagut. Taakku atuarfimmi aqutsisunik suleqateqarniarnermikkut ajornartorsiuteqarlutik soraarlutik oqaluttuarput.

Misissuineq aallartittoq

KNR-imi paasisagut naapertorlugit misissuineq aallartinneqarpoq. 

Maannali suliaq misissuiffigineqarluni aallartinneqarpoq, kinguneraalu atuarfimmi pisortaq, Jørn Holbech, tallimanngormat misissuinerup ingerlanneqarnerani suliunnaartitaagallarpoq.

- Pineqartoq Jørn Holbech, tallimanngormamiit ittuujunnaartitaangallarpoq, misissuiffigineqarnerani. Tasiilami Alivarpimmi ilinniartitsisut sinnissaat, Wilhelm Olsen KNR-imut allappoq.

AAMMA ATUARUK Tasiilami Alivarpi mangler 22 uddannede lærere: Far er bekymret

Jørn Holbech KNR-imiit ataveqarfigaarput, taanna pisoq pillugu oqaaseqarusunngilaq. Tasiilami Alivarpimmi pisortap tullersortaa, Josephine V. Carlsen aamma oqaaseqarusunngilaq. 

Ilinniartitsisut ilinniarsimasut 22-t amigaatigineqartut

Jørn Holbech Tasiilami Alivarpimmi marloriarluni atorfeqarpoq – 2006-imiit 2014-imut. 2020-p aasaanerani atorfimmut uteqqippoq.

Qaammatip siuliani Jørn Holbech, tunumi ilinniaritsisussaaleqineq pillugu KNR-imiit apersornikuuarput. Tassalu Tasiilami Alivarpimmi ilinniartitsisut 62-iusut pingajorarterutaat timelæreriupput. Tamanna isumaqarpoq ilinniartitsisut pingajorarterutaat ilinniarsimanngillat, pingajorarterutaallu Danmarkiminngaanneersuullutik.

Tasiilami Alivarpimmi ilinniartitsisut 22-t ilinniarsimasut amigaatigineqarput.

- Ilinniartitsisut atuartullu akornanni agginngitsoqartaqaaq. Atuartullu atuariartunngitsoortut arlaqaqaat. Ilinniartitsisussaaleqilluni ajornartorsiutit taama amerlatigisut passukkuminaapput, Jørn Holbech KNR-imut oqarpoq.