Tasiilami Alivarpimmi ilinniarsimasunik 22-nik amigaateqartut: Ataataasoq ernumavoq
Tasiilami Alivarpimmi ilinniarsimasunik ilinniartitsisussaaleqisoqarpoq.
Tasiilami Alivarpimmi ilinniartitsisut katillugit 62-iusunit, pingajorarterutaat timelæreriupput.
Ilinniartitsisutut ilinniarsimasut 22-t atorfiit inuttassarsiuunneqarput.
Taamatut inissisimaneq pingasunik atuartuutillip, Aron Jonathansenip ernumanartoqartippaa.
- Angajoqqaanit qisuariartoqarnissaa kissaatigaara, nalunnginnakku uaguinnaat taamatut ernumassuteqartut. Taamaammat iliuuseqartoqartariaqarpoq, taamaanngippat pissutsit ilungersunarsigaluttuinnartumik inissisimalissapput.
AAMMA ATUARUK Tunumi ilinniartitsisussaaleqineq: Isertumi ilinniarsimasunik ilinniartitsisoqanngilaq
Massakkullu ilinniartitsisussaaleqinerup annertusiartuinnaqqilernerani angajoqaat ilaannit ernumanartinneqarpoq.
- Ilinniartitsisunik taama amerlatigisunik amigaateqarneq inissisimaannassappat, meeqqatta atuarfimmi piginnaasaata appariangaatsiarnissaat naatsorsuutigisariaqarparput.
- Tamannalu angajoqqaajusugut akuersaarsinnaanngilluinnarparput.
Meerai pingasut atuarfimmi atuartuupput
Aron Jonathansen nulianilu Tasiilami Alivarpimmi pingasunik atuartuuteqarput.
Ernerat nukarleq 1. Klassimi atuarpoq, ernerat akulleq 4. Klassimi atuarpoq panialu angajulleq 10. Klassimi atuarluni.
Taakku atuarfimmi ilikkagassanik tamakkiisumik ilikkassaneraat, qularutigaat. Ilinniartinniarneqarneranillu ilikkagassat tamakkiisumik tunniunneqanngippata, siunissaat aamma ernumanartumik inissisimasut, ataataasoq oqarpoq.
- Tasiilami meeqqat atuarfianni naammassillutik iliniakkamik aallartitsisartut amerlagisassaaneq ajorput, massakkullu vikariinnanngajannik timelærerinillu taamaallaat ilinniartitsisoqartarnera suli ernumanerusumik ingerlasoqalernissaanut inissikkiartuinnarput.
Tunumi ilinniartitsisussarsiorneq iluatsikkuminaatsoq
Tunumi ilinniartitsisussaaleqineq ukiuni kingullernik ajornartorsiutaajuartarmat, ilinniartitsisut immikkut ajunngitsorsiassaqartittalerlugit aaqqiisoqarpoq. Ilinniartitsisussaaleqinerli annikilliartunngilaq.
Ilinniartitsisut ukiut tamaasa sulinngiffeqarlutik angalanissaannik periarfissaqarput, aamma ukiunik pingasunik atorfeqareernerinik aningaasanik tigusinnaasaanik ileqqaartoqartarpoq, taakku saniatigut:
- Aamma nunaqarfimmut suliartortussat ineqarnermut akiligassaanik tapiiffigineqartarput, Kommuneqarfik Sermersuumi atuarfeqarnermut pisortaq, Riikki Grønvold oqarpoq.
-Kisianni immaqa avinngarusimanera peqqutigalugu inuit ilaquttaminnik maqaasillutik soraarniuteqaqqittuaannarput.
Naatsorsueqqissaartarfiup kisitsisaatai naapertorlugit Tasiilami nunaqarfiinilu meeqqat atuarfiini naammassisartut ikiliartorput.
Ingerlariaqqiffiusunilu ilinnialertartut amerliartorlutik.
