Taamaanngitsoq: Nuummi atuartoq coronavirusimik tunillanneqarsimaneragaagaluartoq tunillanneqarsimanngilaq
Nuussuarmi Kangillinnguit Atuarfianni atuartoq coronavirusimik tunillanneqarsimasoq ippassaq paasineqarpoq, tunillanneqarsimanngitsorli maanna ilisimatitsissutigineqarluni.
Corona pillugu aqutsisoqarfik KNR-imut taama ilisimatitsivoq.
Atuartoq taanna massakkut Danmarkimiittoq, coronavirusimut pingasoriarluni misissortissimavoq. Tunillanneqarsimasoq misissortinnerani siullermi erserpoq, tunillanneqarsimanngitsorli missortinnerini kingullerni marlunni erserluni.
Tassa imaappoq, atuartoq coronavirusimik tunillanneqarsimasutut siusinnerusukkut nalunaarutigineqartoq tunillanneqarsimanngilaq.
AAMMA ATUARUK Juullikkunni angalanissaq nangaasaarutigilluinnaraat
Atuartoq Danmarkimi napparsimmavimmut suliaritikkiartorluni ippassaq marlunngornermi aallarpoq. Danmarkimi napparsimmavimmut uninnginnermini coronavirusimut misissortereernermini tunillanneqarsimasoq paasineqartoq, nakorsaaneq KNR-imut ullaaq ilisimatitsivoq.
Atuartoq tamatuma kingorna marloriarluni misissortereerluni tunillanneqarsimanngitsoq erserpoq.
Meeraq taanna Nuussuarmi Kangillinnguit Atuarfianni 4. klassemi atuartuuvoq.