Juullikkunni angalanissaq nangaasaarutigilluinnaraat

Nutaarsiassatsialak siullertut saqqummiutissavarput: 

- Coronavirusimik tunillatsissimasutut Kangerlussuarmi siumorneqarsimasoq peqqisseqqissimasutut nalunaarutigineqarmat, nunarput asseqanngitsumik maanna inissisimavoq. Tassa imaappoq, maannamut ilisimasavut malillugit nunarput coronavirusimik aammaartumik tunillatsissimasueruppoq. Nunarsuarmi pissutsit qiviaraanni, tamanna nuannaarutissaalluinnarpoq, nakorsaaneq Henrik L. Hansen oqarpoq.

- Soorunamilu neriuppugut taamaaginnassasoq, naak suli tuniluuttoqaraluaqisoq.

Timmisartorlutik nunatsinnukarniat misissuisutut akuerisanit aallannginnerminni misissortissimanissaat pingaaruteqarluinnartoq, nakorsaaneq oqarpoq. Danmarkip napparsimmavissua misissuisutut akuerisaavoq, tassanilu misissortissimanissaq pisariaqartoq, ilanngullugu oqaatigaa.

Politimesteri: Pisiniarfiit juulleriartornerani ulapaarfiusut

Politiit ulluni makkunani juullimi tunissutisiniarpassuaqaleruttortoq pisiniarfiillu ulapaarfiunerat arajutsisimanngikkaat, Bjørn Tegner Bay oqarpoq.

- Coronavirusip siaruatsaalinissaanut maleruagassat nunatsinni malinneqarnissaat ukkattuarsinnarparput. Pingaartumik maleruagassat pisiniarfiit aaqqissuunneqarnerannut tunngasut pineqarmata, juulleriartornerani niuffaffiunerat ingammik eqqarsaatigaara. Tassa imaappoq, pisiniarfiit inunnik qassinik isersimasoqarnersut alaatsinaattorujussuuvagut, taanna oqarpoq.

- Ingammik maleruagassat nunatsinnukartunut atuuttut, tassa angerlarsimaannaqqusaanermut tunngasut, malinneqarnersut alaatsinaattorujussuussavarput. Nunatsinnukartut akisussaassuseqarluarlutik maleruagassanik malinninnissaat naatsorsuutigiuarsinnarparput.

- Inuusuttut ilaat inunnit ilisimanerusorisunit inoqatinut attaveqaatitigut saassunneqartarput. Maleruagassalli malinneqartartut misissuinitsinni paasisarparput.

- Inuusuttut maleruagassanik sapinngisamik malinnerrattut maluginiarparput. Tamanna pillugu qutsavigisariaqarput.

Aammali maleruagssanik malinninngitsunik inoqartoq, taanna oqarpoq. Taassuma arnaq 20-nik ukiulik angerlarsimaannaqqusaanermini illoqarfiliarsimasoq eqqaavaa. Arnaq taanna taamaaliornini pillugu 3.000 koruuninik politiinit akiligassinneqarpoq.

Arnarli taanna qujanartumik tunillatsissimanngitsoq misissorteqqereernerani paasineqarpoq.

- Tunillatsissimagaluaruni illoqarfimmiinnermini tuniluunnerujussuaqaratarsimasinnaassagunaraluarpoq.

Ukiukitsut , soorlu efterskolertut 15-it 17-illu akornanni ukiullit, maleruagassanik unioqqutitsippata, taakkununnga angajoqqaajusut aamma akiligassinneqarsinnaasut, politimesteri ilanngullugu oqarpoq.

Inuusuttorli 18-iliineqanngitsoq inatsisinik unioqqutitsisimappat isumaginninnermi oqartussanut aamma nalunaarutigineqarsinnaasoq, Bjørn Tegner Bay oqarpoq.

- Taamaattoqarpat ilaqutariit inatsisinik unioqqutitsisimasumik ukiukitsuutillit immikkut suliniuteqarfigisariaqassanersut isumaginninnermi oqartussat isumaliutigisariaqassavaat, taanna oqarpoq.

Akiuussutissat juullip ukiortaallu akornanni tikissangatikkaat

Peqqissutsimut naalakkersuisup Anna Wangenheimip (D) inuit ingammik nunatta Danmarkillu akornanni juullikkunni suli angalaleersaartut nangaasaaqqippai.

- Danmarkimi pissutsit aarlerinarput. Danmarkimi misissortinnissamut utaqqisut amerliartuinnarmata aallartussat ilaat aallannginnerminni misissortinnissaminnut angermersinngitsoorsinnaapput. Angalanissaraluamik kinguartitsinissamut suli periarfissaqarput, taamaammat angalanatik angerlarsimaannarnissaat innersuussutigaarput, taanna oqarpoq.

- Nunatsinnut tikittut pingaaruteqarluinnartumik nalunaarutissaqarpugut. Angerlarsimaannaqqusaanermut maleruagassat malissigit, tikinnissinniit ullut tallimassaanni misissorteqqigitsi napparsimalerussilu peqqinnissaqarfik attavigisiuk. Taamaaliornissarsi pingaaruteqarluinnarpoq, taanna oqarpoq. 

Angajoqqaat efterskolertuutiminnik tikeraartillit aamma nalunaaruteqarfigai.

- Angajoqqaat ilaqutariillu qitornaminnik Danmarkimi ilinniartumik efterskolertumilluunniit tikeraartillit inuusuttortatik angerlarsimaannaqqusaanermut maleruagassanik malinninnissaannut tapersersuinissassinnik kajumissaarpassi. 

Periarfissalli aamma pitsaanerulertussanngorpasittut, nakorsaaneq oqarpoq.

- Coronavirusimut akiuussutissat siulliit nunatsinnut juullip ukiortaallu ajornanni tikissangatippavut. Amerlarujussuarnavianngillat, danskilli oqartussaasui akiuussutissanik nunatsinnut pilersuerusuttunik qasseerpassuariarluta attavigaavut, nakorsaaneq oqarpoq. 

- Akiuussutissat tikinnissaannut qulakkiigassat tamakkingajalerpavut. Suliaq imaannaanngilaq, qaammatinilu tulliuttuni akiuussusiinermut pilersaarusiornissamut siunnersuusiuleruttorpugut.