Syfilisertut amerleriartut

Kinguaassiutitigut nappaammik syfilisimik tunillatsissimasut Nunatsinni amerleriangaatsiarsimapput. 2010-mi syfilisertoqarsimanngilaq, 2016-mili 71-t tunillatsissimallutik. Taamaattoqarnerata takutiinnarpaa atoqatigiinnermi usuup puua atorluarneqartarsimanngitsoq, Nunatsinni nakorsaaneq taama oqaaseqarpoq.
Assi © : Jonas Løvschall-Wedel
Allattoq Mads Pedersen
maajip 31-at 2017 06:20

2016-mi syfilisimik tunillatsissimasut nalunaarsorneqarsimasut 71-usut. Taakkunani angutit 33-ullutik arnat 38-usut. Kisitsisit nutaat Naatsorsueqqissaartarfiup saqqummiussaasa takutippaat 

Syfilisimik tunillutsissimasut 2011-miilli amerliartuinnavissimapput. 2010-mi syfilisertoqanngeriarluni, 2011-mi pingasuusimapput. Kingorna amerliartupiloorlutik 2016-imi 71-usimallutik. 

Syfilisimik tunillatsissimasut taama amerleriarsimatiginerat atoqatigiinnermi mianersugaalliortoqarneranik takutitsisoq, nunatsinni nakorsaaneq Henrik Trykker naliliivoq. 

- Inuit usuup puuanik atuinissaq pikkoriffiginngilaat, Henrik Trykker KNR-imut oqarpoq. 

Kinguaassutitigut nappaatit ataatsimut isigalugit 2015-imut sanilliullugit ikileriarsimapput. Taamaattoq ikigisassaanngillat, tassami 2016-mi syfilisimik, klamydiamik gonorémillu tunillatsissimasutut nalunaarsorneqarsimasut 4.445-simapput. 

Taakku affai sinnerlugit, tassa 2.674-t arnaapput. Sinnerilu 1.771-t angutaallutik. 

Arnat kinguaassiutitigut nappaatinik tunillatsissimasut amerlanerunerinut Henrik Trykkerip nassuiaatigaa arnat naartunermut atatillugu misissorneqarneranni nappaatit naammattoorneqartarmata. 

AAMMA ATUARUK Syfilis qaammarsaanikkut illersuuteqarnikkullu akiorniarneqassaaq

 

AAMMA ATUARUK Syfilis tuniluuteqqileratarsinnaasorigaat

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk