Syfilis tuniluuteqqileratarsinnaasorigaat
Dronning Ingridip Napparsimmavissuani nakorsat pingasut ernummateqartut taama mianersoqqussuteqarnerarlugit Atuagagdliutini ullumi saqqummersuni allaaserineqarpoq.
Nakorsat taakkua kisitsisit nakorsaaneqarfimmeersut misissoqqissaarsimavaat syfilisimullu nakorsaatissatut agguaanneqartunut sanilliussimallugit.
Syfilisimik tunillatsissimasut 96-it ukiuni kingullerpaani katsorsarneqarsimasut kisitsisit paasinarsisippaat.
Ukiut tallimat matuma siornagut - 2010-mi - tunillatsissimasunik naammattuugassaqanngingajavippoq.
Syfilisip tuniluunnera aamma siaruaassimasoq nakorsat misissueqqissaarnermikkut paasisaasa ilagaat. 2011-mi illoqarfimmi ataasiinnarmi tunillaassuuttoqaraluarpoq, maannali ikinnerpaamik illoqarfinni arfineq marlunni tunillaassuuttoqarluni.
AAMMA ATUARUK Syfilisi Nunatsinni atugaanerulerpoq
Nuna tamakkerlugu iliuuseqarnissaq eqqarsaatersuutigigaat
Piffissami kingullermi tunillatsissimasut amerlanerpaartaat inuusuttuupput agguaqatigiissillugu 27-nik ukiullit. Tamatuma paasinarsisippaa, inuusuttut illersuuteqaratik atoqatigiittartut, tassa usuup puuanik atuineq ajortut.
Nappaatip tuniluunnera unitsinniarlugu peqqissutsimik suliaqartut nuna tamakkerlugu iliuuseqarnissaq eqqarsaatersuutigisinnaagaat, nakorsat oqaatigaat.
Nakorsat pingasut - Nadja Albertsenip, Gert Mulvadip aamma Michael L. Petersenillu syfilisimik misissuinertik nakorsat atuagassiaanni tuluttut saqqummersartumi International Journal of Circumpolar Healthimi saqqummiuteqqammerpaat.