Syfilisi Nunatsinni atugaanerulerpoq

Inuit syfilisimik tunillatsissimasut 1995-miit 2011-p tungaanut ikittuinnaariarlutik, ilaatigut ukiuni ataasiakkaani tunillaassuuttoqanngivissortarluni, ukiuni kingullerni tunillaassuunneq annertuseriasaarpoq.

- 2012-mi syfilissimik tunillatsissimasut aqqaneq marlunngoriasaarput, siorna 25-t tunillatsissimallutik, ukiorli manna maannamut paasisagut aqqaniliullutik.

Nunatsinni nakorsaanerup, Flemming Kleist Stenzip aamma oqaluttuaraa, tunillatsissimasut taama amerleriasaarnerinut pissutsit assigiinngitsut arlallit pissutaaqataasimasinnaasut.

- Kinguaassiuutitigut tunillaassuunnerit ukiut ilaanni qaffasissorujussooriarlutik ukiut ilaanni appariasaartarput, ilaatigut ukiuni 20-ni 30-niluunniit tunillaassuuttoqarunnaavissoriarluni tassanngaannaq tunillaassuunneq annertuseriasaartarluni.

Nunani avannarlerni tunillatsittartut aamma amerleriarsimapput
Flemming Kleist Stenzip aamma oqaluttuaraa, Nunani avannarlerni aamma USAmi syfilissimik tunillatsittartut amerlerialaarsimasut paasineqarsimasoq.

Nunatsinni syfilisimik maanna tunillaassuunneq avataaniit eqqunneqarsimagunanngitsoq nakorsaanerup oqaatigaa, illoqarfiillu pingasut syfilisimik tunillaassuuffiunerpaasut ukuusut taallugit.

- Maniistumi, Sisimiuni Nuummilu tunillaassuunnerit amerlanerpaapput.

Nunatsinni nakorsaaneq, Flemming Kleist Stenz oqarpoq.