VIDEO Syfilis qaammarsaanikkut illersuuteqarnikkullu akiorniarneqassaaq
Kinguaassiuutitigut nappaammik syfilisimik tunillatsissimasunik 2010-mi naammattuuisoqanngilaq siornali 52-it naammattoorneqarlutik, taamaammat tuniluuteqqilerartarsinnaanera nakorsanit maanna ernummatigineqalerpoq.
- Nappaatip tuniluuteqqilernissaanut aallaqqaataasinnaasutut isikkoqarsinnaavoq, tamannali soorunami neriuutiginngilarput, nakorsaq Michael L. Pedersen taama oqarpoq.
Tunillatsinnermit sapaatit-akunneri 2-4-t qaangiunnerini qanoq ikeqalertoqarsinnaaneranut assersuutissat videomi qulaaniittumi takuneqarsinnaapput.
- Nappaatip ersiutai tassaanerusarput kinguaassiuutitigut imaluunniit atoqatigiinnermi syfiliseqarfiusut attorsimagaanni, soorlu qanikkut ikeqalerluni ammartiternerit, nakorsaq nassuiaavoq.
AAMMA ATUARUK Kinguaassiuutitigut nappaatit oqallisigineqalerlik
Michael L. Pedersenip Dronning Ingridip Peqqissaaviani nakorsaqatini Gert Mulvad aamma Nadja Albertsen peqatigalugit pitsaanngitsumik ineriartortoqarnera sukumiisumik misissuiffigisimavaat. Maannalu mianersoqquteqarput nappaammullu tassunga nappaatinullu allanut inuit illersuuteqarnissaminnik eqqarsarnerulernissaat neriuutigaat.
Nappaammik syfilisimik tunillatsissimasut katsorsarneqanngikkunik qaratsakkut, ammikkut, saarngitigut taqqatigullu akornusersinnaapput.
Nuummi, Qasigiannguani, Ilulissani, Sisimiuni, Tasiilami, Uummannami Upernavimmilu siorna syfilisimik tunillatsittoqarsimanera nalunaarsorneqarsimavoq.
AAMMA ATUARUK Peqqinnissaqarfik: Illersuuteqaratik atoqatigiittartut amerlavallaarput
Aappaqarneq usuup puuata atorneqartarneranut apeqqutaasoq
Nuummi inunnik aqqusinermi naapitatsinnik apersuinitta takutippaa inuusuttut atoqatigiinnermi usuup puua atorpiartanngikkaat.
- Naagga, iluarivallaannginnakku, Marie Didriksen oqarpoq.
- Qaqutikkut. Angutaateqarpunga, Arnatsiaq Poulsen oqarpoq.
- Ilaannikkut. Kisianni maannakkorpiaq qaammatit qulissaanik angutaateqarpunga. Angutaateqanngikkallarama usuup puua atukkajuttarpara, Nivi Johansen oqarpoq.
AAMMA ATUARUK Syfilis tuniluuteqqileratarsinnaasorigaat
Kikkut tamarmik akisussaaffimmik tiguseqataassapput
Peqqissutsimut naalakkersuisup Doris Jakobsenip oqaatigaa kinguaassiutitigut nappaatit akiorniarneqarnerinut naalakkersuisoqarfini ukiumut 14 millionit koruuninik atugassaqartinneqartoq.
- Angajoqqaat kajumissaarusuppakka meeqqatik oqaloqatigeqqullugit, soorlu aamma meeqqat atuarfiat tamakku pillugit ilinniartitsinissamut ilaatigut akisussaaffeqartoq. Tamatuma saniatigut peqqissutsimut naalakkersuisoqarfiup pitsaaliuineq aamma akisussaaffigaa.
- Kinguaassiuutitigulli nappaatinik tunillatsissimasut amerliartortillugit ajornartorsiutip akiornissaanut aamma anginerusumik akisussaaffeqalerpugut, Doris Jakobsen taama oqarpoq.
AAMMA ATUARUK Kalaallit 1435-t quigaangamik qasilisooruloortarput
Pitsaaliuinermik suliallit 8. aamma 9. klassit pulaarlugit ilaatigut kinguaassiuutitigut nappaatit pillugit oqaloqatiginnittarnerannut aningaasanik atuisoqartarnera aamma erseqqissaatigaa.
- 14-15-inik ukiullit nappaatinik taama ittunik tunillatsissimasut socialimut ingerlanneqartalernikuupput, aammalu suleriusissaq suli suliarineqarpoq.
- Kisianni saniatigut suli aningaasaleeqqinnissaq ujartorneqartariaqarpoq, taannalu suliaq maannakkut ingerlavoq, peqqissutsimut naalakkersuisoq oqarpoq.
Doris Jakobsen aamma kaammattuivoq inuit nakorsiaqqullugit, taamaaliornikkut ilisimanngisaminnik kinguaassiuutitigut nappaatinik assigiinngitsunik tunillaanissaat pinngitsoortinniarlugu.
