Kinguaassiuutitigut nappaatit oqallisigineqalerlik

Kinguaassiuutitigut nappaatinik tunillanneqartartut nunatsinni amerliartuinnarput. Nakorsaaneqarfimmiit nutaarsiassaavoq syfilissimik tunillatsittartut sukkasuumik amerliartupiloortut. 2014-niinnarmini tunillatsittut 50-siusimapput, allaat tunillatsittut akornaniissimalluni niviarsiaraq 13-nik ukiulik.

Allattoq Paarnaq Hansen, Nauja Møller

aggustip 20-at 2015 16:48

Napparsimaveqarfinni sullissisut isumaqarput, oqallinnerit, nuna tamakkerlugu suliniutit aningaasallu amerlanerusut kinguaassiuutitigut nappaatinut akiuiniarnermi pisariaqartinneqartut.

- Oqallisigiuaannartariaqarpoq. Maani aamma oqallisigiunnaaraangatsigi tassa oqaatigiinnarsinnaavara, qaammatit arfineq pingasut kingulliit pinaveersaartitsisoqannginnatta takusinnaalerparput, kinguaassiuutitigut nappaatit naartuersittullu amerlasoorujussuanngoriataartut, Maniitsup peqqissaaviani peqqissaasutut ikiorti Karoline Olsen, kisitsisit saqqummereernerisa kingorna taama oqarpoq.

Nittartagaq Netdoktor.dk malillugu Syfilis tassaavoq kinguaassiuutitigut nappaat bakteriamit pinngortartoq. Tunillatsinnermiit qaammatit arlaqanngitsut ingerlareeraangasa annernanngitsumik ikeqalernermik kinguneqartarpoq. Nappaat katsorsarneqanngippat qaratsakkut katsorsarneqarsinnaanngitsumik innarliisinnaasoq.

Peqqissutsimut Pitsaaliuinermullu Aqutsisoqarfimmi Nakorsat qullersaat isumaqarpoq, annertunerusumik iliuuseqartoqartariaqartoq. Aamma peqqissutsimut aqutsisoqarfiup, peqqinnissaqarfiup ilinniartoqarfiillu akornanni sunniivigeqatigiinneq.

- Taakku pingasut akornanni suleqatigiittoqartariaqarpoq, minnerunngitsumillu innuttaasut sunniivigeqatigalugit, innuttaasummi tassani pingaarnersaammata, Anne Marie Ulrik oqarpoq.

Aamma atuaruk Peqqinnissaqarfik: Illersuuteqaratik atoqatigiittartut amerlavallaarput

Kinguaassiutitigut nappaatit pillugit immikkut suliniuteqartoqaraluarpoq peqqissutsimut naalakkersuisoq Doris Jakobsen oqarpoq, taassumalu nassuerutigaa kisitsit kingulliit takutikkaat annertunerusumik iliuuseqartariaqarnera.

Taamaattumik kinguaassiutitigut nappaatit akiorniarlugit suliniutit amerleriarsinniarlugit naalakkersuisoqarfimminut aningaasanik amerlanerusunik isumaqatigiinniarniarpoq.

- Suli paasititsiniaaneq annertusarneqassappat aningaasanut inatsimmut uani massakkut isumaqatiginninniarnermi immikkut annertusaavigineqarnissaat avaqqunneqarsinnaanngilaq. Paasititsiniaaneq annertunerusut pissappata aningaasat amerlanerusut pisariaqartinneqassammata, peqqissutsimut naalakkersuisoq Doris Jakobsen taama oqarpoq.