Assi: KNR

Kalaallit 1435-t quigaangamik qasilisooruloortarput

Nappaatipalaat ajornartorsiutaanerat annertuseriarpoq.

Kalaallit Nunaanni innuttaasut gonorrertut Danmarkimi gonorrertunut naleqqiullugut marloriaammik amerlanerupput. Innuttaasut tuusiniugaangata ataasiunngitsut. Naagga, Danmarkimi gonorrertunit tamarmiusunit marloriaammik amerlanerupput.

TV2 qanittukkut ilanngutassiivoq Danmarkimi gonorrerrattut. Danmarkimimigooq ukiormanna tunillatsissimasut 500-nit 672-inut amerlisimammata.

Nunatsinni tunillatsissimasut 1355-init 1435-inut amerlisimapput. Nunatsinni Nakorsaaneqarfiup kisitsisiaataani suli tamanut saqqummiunneqanngitsuni tamanna takuneqarsinnaavoq.

Nunatsinnili nappaatipalaat arlallit tuniluuttarneri nutaajunngilaq. Nunatsinni klamydiamik tunillatsissimasut Danmarkimut naleqqiullugit quleriaammik amerlanerupput, innuttaasulli amerlassusaannut tunngatillugu gonorrerut 200-riaammik amerlanerupput.

Nunatsinni nakorsaanerup Flemming Kleist Stenzip kisitsisit aarlerinarnerarpai, naak Nunatsinni nappaatipalaat arlallit atugaanerat nutaarsiassaanngikkaluartoq.

- Kisitsisit qaffasittuaannarnikuupput. Gonorremilli klamydiamillu tunillatsissimasut amerliartuinnarput. Minnerunngitsumillu syfilisimik tunillatsissimasut aamma amerliartorput, naak nappaatipalaaq taanna ukiorpassuarni takussaajunnaarsimagaluartoq.

Nunani killerni sanilerisatsinnut sanilliutissagutta, inissisimanerput ajorpallaanngilaq.

- Nunavummut tunngatillugu naligiikannerpugut. Kisitsisilli suli qaffasippallaaqaat.

Flemming Kleist Stenz gonorrep ullumikkut katsorsarneqartarneranut tunngatillugu ajornartorsiutitaqarsoraa. Maannami usuup qorluanut annernaqisumik mangussisarneq atorneqarani quumik misissugassamik quisitsisoqaannartarpoq.

Tamannalu pissutigalugu nappaatipalaat pillugit Nunatsinni nakorsaaneqarfimmi suleqatigiissitanik pilersitsisoqarsimavoq. Periaatsit nutaat pisoqqallu kattutitinniarneqarput.

- Quumik misissuisoqaannartarnersimanera pitsaalluinnarpoq, inuimmi misissortinnissaat taamaasilluni ajornannginnerulermat. Aammali tunillatsissimasut oqaloqatiginissaat, kikkunnillu ilaqarsimanerannik oqaloqatiginissaat tunillaassuunnerlu unitsinniarlugu taakku misissortikkiartornissaat eqqaamaneqartariaqarpoq.

Gonorrernerluni nalornissutigigaanni, ilisarnaatigisai ilisariuminartupilussuupput.

- Quinermi qasilisooruloortoqartarpoq. Quigaanni annernartupilussuusarpoq. Ersiutit siullersarivaat, aammali usuup qorluatigut maqinermut aniasoqarsinnaavoq, taannalu sungaartumik qalipaateqartarpoq, Nunatsinni nakorsaaneq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat