Nunanut allanut tunngasunut taarseraattoqangaatsiartoqarnera qularnartoqarnerulersitsisoq
- Kalaallit pisuni assigiinngitsuni qanoq iliuuseqarniarnersut nalornissutigineqalersinnaavoq, tamannalu ajoraluarpoq.
Pingaartumik nunanik allanik suleqateqarnermi allanngujaatsuunissaq pisariaqartinneqarpoq, nunat allat taamaalillutik nunatta sunik pingaartitsisuunera ilisimaniassammassuk.
Nunanut allanut tunngasunut naalakkersuisut tallimat
Vittus Qujaukitsoq nunanut allanut tunngasunut naalakkersuisuujunnaarsinneqarpoq akisussaaffinili sinneruttut ingerlatiinnarsinnaagai neqeroorfigineqarpoq. Ukiuni marlunni qaammatinilu sisamani Naalakkersuisooreerluni facebookikkut allagaqarluni Naalakkersuisunit ulloq apriilip 24-at, 2017 tunuarpoq.
Suka K. Frederiksen ulloq taanna nunanut allanut tunngasunut Naalakkersuisunngorpoq.
Aggustilli 31-at, 2017-mi sulinngiffeqarluni aallartippoq.
Karl Kristian Kruse Suka K. Frederiksenip sulinngiffeqarnerani taartaasutut atuutilerpoq.
Suka K. Frederiksen ulloq novembarip 27-at, 2017 suliffimminut uterpoq, Inatsisartunullu apriilip 24-anni qinersisoqarnissaata tungaanut naalakkersuisuuvoq, kingornalu politikki qimallugu.
Vivian Motzfeldt maajip 11-at, 2018 nunanut allanut tunngasunut naalakkersusiunngortinneqarpoq.
Inatsisartunullu oktobarip 3-anni siulittaasunngornermini Naalakkersuisuujunnaarpoq.
Ane Lone Bagger oktobarip 5-anni nunanut allanut tunngasunut naalakkersuisunngortinneqarpoq.
(Vivian Motzfeldtip naalakkersuisuujunnaarneratigut Aqqalu Jeremiassen ulluni marlunni nunanut allanut tunngasunut akisussaaffeqarpoq.)
- Kalaallit Nunaata siunissami namminersortunngornissamut ingerlanera eqqarsaatigigaanni. Tamatumani nunani tamalaani suliani anguniakkanilu nunatta ilaanerminik takutitsinissaa pingaaruteqartorujussuuvoq.
AAMMA ATUARUK Qujaukitsoq tunuartoq
Vittus Qujaukitsoq nunanut allanut tunngasunut Naalakkersuisutut 2017-imi apriilip qaammataani tunuarpoq. Taamanimiit qaammatit 19-it qaangiussimalerput, atuuffimmilu politikerit assigiinngitsut issiasimapput: Suka K. Frederiksen, Karl Kristian Kruse, Vivian Motzfeldt maannakkullu Ane Lone Bagger.
Atuuffimmili tassani suliallit taama taarseraatsigitillugit, nunat allat sinnissaannut pisariaqartumik attaveqarlualernissamik suliaq uninngassasoq, Maria Ackrén nassuiaavoq.
AAMMA ATUARUK Suka K. Frederiksen napparsimasutut nalunaarutigineqartoq
AAMMA ATUARUK Suka K. Frederiksen qinigassanngortinnianngilaq
- Nunanik allanik suleqateqarneq immaakkajuppoq, inuit attaveqatigiinnerannik inuillu isumaqatigiinniaqatigiittut oqaloqatigilluarsinnaanerannik tunngaveqartarluni.
Tassalu nunat allat nunatsinnut pissusiat, taakkua nunanut allanut pissusiannit allaanerulersinnaavoq, nunatsinnullu piumasaqaataat annerulerlutik.
- Kalaallit Nunaat tusaaneqarumalluni immaqa ilungersornerusariaqassaaq.
AAMMA ATUARUK Hans Enoksenip paarlattaa aana
AAMMA ATUARUK Naalakkersuisut nutaat takukkit
Atorfillit nunanut allanut isumaqatigiissuteqarniarnermi suleqateqarniarnermilu nalinginnaasumik piareersaangaatsiartut, Maria Ackrénip erseqqissaatigaa. Taamaammat politikerit taarseraakkajunnerisa unammillernartuunera, nuna allat nunatta siunnerfiinik nalonilernerannik kinguneqartarpoq.
KNR-ip naalakkersuisunik kisitsinermini nunanut allanut tunngasunut naalakkersuisutut, Aqqalu Jeremiassen ulluni marlunni issiasoq ilanngutinngilaa.