Suka K. Frederiksen qinigassanngortinnianngilaq

Suka K. frederiksen facebookimini pingasunngornermi unnukkut ima nalunaaruteqarpoq:

- Allaffigitillattaarnikka pillugit nalunaarutigereersinnaavara qineqqusaarnaviarnanga, Suka K. Frederiksen Facebookimini taama nalunaaruteqarluni allappoq nangillunilu:

- Qujanaq qinersisorisimasannut sullisseqataanissannut periarfissaqartikkassinga, inuppassuillu naapitat ilikkakkallu tamassinnut qujanaq, Siumut sinnerlugu Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen pingasunngornermi unnukkut taama nalunaaruteqarpoq.   

Suka K. Frederiksen 2014-imi Inatsisartunut qinersisoqarmat ilaasortanngorpoq, 172-nik taaguunneqarluni.
Qinigaaffimmilu Namminiilivinnermut, Nunanut Allanut Nunalerinermullu Naalakkersuisutut akisussaaffeqarluni.

Suka K. Frederiksenilu siullersaalluni Namminiilivinnermut naalakkersuisuuvoq, naalakkersuisoqarfillu naalakkersuisoqatigiinnit tassa Siumumit, IA-mit Partii Naleqqamiillu pilersinneqarpoq.

Suka K. Frederiksen siorna kræftimik nappaateqalernini pissutigalugu naalakkersuisutut sulinngiffeqarpoq, siornalu novembarimi naalakkersuisutut uteqqilluni.