Siunnersuisoqatigiit nunatta innarluutilinnut iliuusai isornartorsioraat
![](/sites/default/files/styles/image_934x467/public/2023-11/Orniffik%20Poul%20Lauge.jpg?itok=b4r42ru0)
Naalagaaffiit Peqatigiit nunatsinni Danmarkimilu innarluutilinnut susassaqarfinnik naliliinera tallimanngormat aallartippoq. Naalagaaffiit Peqatigiit ataatsimiititaliaata nunani marlunni susassaqarfinni pisussaaffiit eqquutsinneqarnersut nalilertussaavaat.
Inuit Pisinnaatitaaffii pillugit Siunnersuisoqatigiit naliliisunut ilaavoq. Tamannalu siulittaasumit Qivioq Løvstrømimit atuarneqarpoq. Taanna minutsini marlunni oqaaseqarsinnaavoq, taassumalu taakku atorlugit nunatta pisussaaffini eqqutsinngikkai oqaatigaa:
- Inuit innarluutillit nalinginnaasumik pisinnaatitaaffii unioqqutinneqarput. Inuit innarluutillit inuiaqatigiinni naligiimmik inissisimasussaapput, ullutsinnili inuiaqatigiinni taamaattoqanngilaq, taanna oqarpoq.
Susassaqarfiup ukkatarineqarnera
Qivioq Løvstrømip oqaaseqarnera inuit innarluutillit pillugit oqaaseqartartup, Anja Hynne Nielsenip susassaqarfimmi tassani unammillernartoqarneranik KNR-ikkut oqaaseqarneranit sapaatit akunnialui qaangiunnerani pivoq.
Tamatumalu saniatigut innarluutillit pillugit inatsit sivisuumik utaqqineqarsimasoq tusarniaassutigineqarluni.
Naalakkersuisullu innarluutilinnut susassaqarfimmi iliuuseqarfimmut atatillugu ulluni kingullerni sapinngisartik tamaat iliuuseqarput.
Inuit innarluutillit pillugit inatsisissap atulersinneqarnissaanut 40 millionit koruuninik sapaatip akunnerata siuliani pingasunngornermi immikkoortitsisoqarpoq, naalakkersuisullu Aqqaluaq B. Egedep iliuusissatut pilersaarut “nutaaq” siornali pilersaarummut assingusoq tallimanngormat nassiuppaa.
Iliuuseqartoqarnissaaanut equngasoqartoq
Taamaammat nunatta inuit innarluutillit pillugit politikkiani piffissami matumani ukkatarinnittoqarpoq – Qivioq Løvstrømilli oqarnera naapertorlugu iliuuseqartoqarnissaa amigaataavoq.
Nunarput Naalagaaffiit Peqatigiit piumasaqaataannik eqquutsitsissaguni susassaqarfiit pingasut pingaartumik ukkatarineqartariaqarput.
Siullertut susassaqarfimmi suliniutit suleriutsillu sorpiaanersut erseqqissaatigineqartariaqarput.
Inuit Pisinnaatitaaffiit pillugit Siunnersuisoqatigiillu naligiissitaanermut inatsimmi nutaami inuit innarluutillit naammattumik illersugaanngitsut isumaqarput.
Kingullertullu inuit innarluutillit Danmarkimut aallartariaqarajuppallaarput – amerlasuutigullu namminneq piumassuserinngisartik malillugu – nalinginnaanerusumilli inuuneqarnissaminnut pisariaqartumik ikiorneqarnissaq pillugu.
Tamakkulu naalakkersuisut inuit innarluutillit pillugit susassaqarfimmi namminneq pisussaaffimminnik eqquutsitsissagunik ilaatigut aaqqiissuteqarfiginiartussaavaat.