Nunatsinni inunnik innarluutilinnik ilungersuussineq: Ilungersunarpoq, iliuuseqartukimmat!

Nunatsinni inuit innarluutillit ukkatarineqarnerulernikuugaluartut suli iliuuseqartukippallaarujussuarpoq. Taamaannera innarluutillit pillugit oqaaseqartartuata ilungersuaatigaa.

Allattoq Kim Hinrichsen

aggustip 03-at 2024 09:33

Nutserisoq Hanne Petersen

KNR-ip nunatsinni inuit innarluutillit pillugit oqaaseqartartoq, Anja Hynne Nielsen, inunnik innarluutilinnik isumaginninnermik Avannaata Kommuniani sulianik nakkutilliinermit nalunaarusiaq saqqummeqqammertoq pillugu oqaloqatigaa.

Taassumalu oqaaseqartartuuffigisani anersaaqarfigeqai, oqaaseqartartuuffigisanili pillugit iliuuseqartukippallaarujussuarneranik suaaruteqartarnerata iliuuseqartoqarneranik kinguneqartannginnerani taassumunnga nukillaarsaataaqaaq:

- Ilungersunaqaaq. Ukkatarineqarnerat kigaatsumik annertusiartortoq arajutsisimanngilara. Taamaanneralu qujanaqaaq. Aammali ilungersuanarpoq, iliuuseqartukimmammi. Tusaaneqarput, iliuuseqartukippallaarujussuarlunili, taanna oqarpoq nangillunilu:

- Tiliumi suleruloqaagut. Ikittuararsuugatta ilungersuaqaagut. Taamaammat iliuuseqaluusaartoqarnera soorunami erloqinaqaaq, taanna oqarpoq.

Kikkulluunniit pingaartinneqassasut

Tamannali inatsisinik aningaasanillu amigaateqarnermut tunngavallaanngilaq. Inunnulli kukkusarnernit puigoqattaarnermillu eqqugaasunut tunnganeruvoq:

- Arpasukaarnaqaaq. Akulikeqisumik. Suliammi tamakkuninnga ilaqartut sullinneqartut ilaasa uagutsinnut nammineerlutik tusarliussaqaraangata tussunngunartarpoq. Artornarlunilu. Taamaammat iliuuseqartoqaqqunartaqaaq, nunatsinni inuit innarluutillit pillugit oqaaseqartartoq oqarpoq.

Aamma atuarukTilioq tarnikkut nappaatilinnut immikkoortortaqarfik pillugu nalunaarusiamut qisuariartoq: Ukiorpassuarni suaarutigisarpagut

Anja Hynne Nielsenili suli neriuuteqalaarpoq:

- Suliassaqarfimmi taanna pillugu iliuusissatut pilersaarutitaassaq saqqummiunneqangajalerpoq. Inuiaqatigiinni kikkulluunniit pilersaarutitaassami pingaartinneqassasut neriuutigaarput, taanna iliuusissatut pilersaarutitaassaq ukiut arlallit matuma siornali suliarineqarluni aallartinneqartoq nunattalu Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaannik naapertuinissaanik qularnaarisussaq pillugu oqarpoq:

Inuit innarluutillit pisinnaatitaaffiinut isumaqatigiissut naatsumik

Naalagaaffiit Peqatigiit (FN) inuit innarluutillit pisinnaatitaaffiinut isumaqatigiissutaanni siunertaavoq "inuit innarluutillit tamarmik inuit allat assigalugit inuit pisinnaatitaaffiinik tunngaviusumillu kiffaanngissuseqarnissamut pisinnaatitaaffinnik tamanik atuisinnaanerisa siuarsarneqarlutillu illersorneqarnissaat periarfissaasalu qulakkeerneqarnissaat..."

Isumaqatigiissummi tunngavigisat makkuupput:

a) Inuup ataqqinassuseq pigeriigaa, inuttut nammineq ingerlaneq, ilanngullugit nammineq aalajangiisinnaanermut kiffaanngissuseqarnera aamma inunnut allanut qilersorsimannginnera
b) Assigiinngisitsinnginneq
c) Tamakkiisumik pimoorussamillu peqataaneq aamma inuiaqatigiinnut peqataalersinneqarneq
d) Assigiinngissuteqarnerup ataqqineqarnera aamma inuit innarluutillit inunnik inuiaqataasunillu allanit assigiissuteqarnerannik akuerinninneq
e) Periarfissat assigiissut
f) Tikinneqarsinnaassuseq
g) Angutit arnallu akornanni naligiissitsineq
h) Meeqqat innarluutillit ineriartoqqinnissamut periarfissaasa ataqqineqarnerat aamma kinaassutsimik pigiinnarnissaanut pisinnaatitaafiannik ataqqinninneq.

Taamaammat pilersaarutitaassaq ilumut iluaqutaajumaarnersoq suliluunniit saqqummiunneqanngitsoq ernummatigilereerpaa:

- Iliuusissatulli pilersaarutitaassaq timitalernagu imminiiginnarneqarnissaa ernummatigaaraa. Inatsisartut ukiaru ataatsimiikkunik tamatumunnga aningaasaliissanersut pissanngatigaara, taanna oqarpoq.

Akerleriinnasi suliassaqarfik salliutissiuk

Iliuusissatut pilersaarutitaassaq ilumuik timitalerneqalereersimasussaagaluarpoq. Suliassaqarfimmili tassani suliat allat assigalugit kinguartippoq, inuillu innarluutillit tapersersorneqarnissaat pillugu inatsisissatut siunnersuut suli aamma aalajangiiffigineqarnani:

- Iliuusissatut pilersaarutitaassarmi timitalerneqalereersimasussaagaluarpoq. Taamaaliornissamulli suliluunniit aamma aningaasaliisoqanngilaq. Aningaasaliiffigineqanngippat iluaqutaangaarnavianngitsoq aamma nalunngilara. Tassa iliuuseqartoqaqqunaqaaq, Anja Hynne Nielsen oqarpoq.

Aamma atuarukTiliup Ivaaqqami annertuumik innarluutillip erninera qisuariarfigaa

Inatsisissatummi siunnersuutaareersoq taassuma neriulluarfigivallaanngilaa. Tilioq inatsissatut siunnersuutip qanoq iluseqarnissaanik apriilimi tusarniaasoqarneranili siunnersuuteqaaloreerpoq. Siunnersuutaanili ikittuinnaat inatsissatut siunnersuummut ilanngunneqarput, Anja Hynne Nielsen oqarpoq:

- Inatsisissatut siunnersuut akuerineqarpat, pissutsit ajorseriaannassapput, aamma Avannaata Kommuniani inunnik innarluutilinnik isumaginnittoqarfiup suliaani nakkutilliinermit nalunaarusiami uppernarsarneqartutulli ittut amerlissapput, taanna oqarpoq nangillunilu:

- Inatsisissatut siunnersuut kommuninut isumaginninnermillu sulialinnut oqilisaassinavianngilaq. Tusaaneqanngiinnaruttalu suliassaqarfimmi tassaniinneq erloqinarseriaannassaaq.

Aamma atuarukTilioq arlalinnit attavigineqartartoq – taakkulu Avannaata Kommunianeersuunerupput

Nunatsinnili inuit innarluutillit pillugit oqaaseqartartoq eqqasukkaluarluni suli neriuuteqarpoq, nunatsinnilu politikerit suliassaqarfimmi tassani ajornartorsiuterpassuit aaqqinnissaannut isumaqatigiikkumaartut upperalugu:

- Suliassaqarfimmi tassanerpiaq partiilersornatik kivitseqatigiinnissamik isumaqatigiissasut. Ikiorneqarnissamik pisariaqartitsinerpaartatsinnik ilaginnaaqataarusunngilluinnarpugut.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.