Tilioq tarnikkut nappaatilinnut immikkoortortaqarfik pillugu nalunaarusiamut qisuariartoq: Ukiorpassuarni suaarutigisarpagut

Sulisut amigarnerat. Uninngasut angerlartinneqartoq uneqqittartut. Tarnikkut nappaatinut tunngatillugu immikkut ilinniarsimasumik nakorsaqanngitsoq. Meeqqat inuusuttullu misissorneqarnissaminnut ukioq ataaseq tikillugu utaqqisut.

Dronning Ingridip Napparsimmavissuani tarnikkut nappaatilinnut immikkoortortaqarfimmi piviusut taamaattut, Ombudsmandip nalunaarusiaata kingulliup decembarip aallartinnerani saqqummertup takutippaa. Inuit innarluutillit oqaaseqartartuallu, Anja Hynne Nielsen tamanna pillugu isornartorsiuivoq:

- Atuakkat aalassannarput. Politikerit iliuuseqartariaqarput, tamannami akuersaarneqarsinnaanngilluinnarpoq. Ilisimasalli taakku nutaajunngillat. Ukiorpassuarni A1-imi pissutsit isornarluinnarnerat pillugu suaarutiginnittarpugut, taanna KNR-imut oqarpoq.

- Inuit siusippallaartumik angerlartinneqaraangata naammattumillu katsorsarneqanngikkaangata uneqqinnissaannut aarlerinartoqarnerusarpoq. Saniatigullu nutaanik nappaateqalertoqarsinnaasarpoq, tamanna qanigisaasunut aamma sunniuteqartarpoq.

- Ilanngullugulu kommunerisamit sulileqqinnissamut imaluunniit nutaamik suliffittaarnissamut ikiorneqanngikkaanni angerlarsimaffeqanngitsunngornissamut allanillu ajornartorsiuteqalernissamut aarlerinartoqarnerusarpoq. Taamaammat kingunerluuteqangaatsiartarpoq, Tiliumit oqaaseqartartoq oqarpoq.

Misissorneqarnissamut piffissap sivisunera

Ombudsmandip pulaarnerata nalaani A1-mi sulisussaaleqineq pissutigalugu uninngasut arfineq-pingasuinnaat inissaqartinneqartut nalunaarusiami allassimavoq. Immikkoortortaqarfik nalinginnaasumik aqqaneq-marlunnut inissaqartitsiarpoq.

Meeqqat inuusuttullu misissorneqarnissaminnut ukioq ataaseq tikillugu utaqqisinneqartarput. Pingaartumillu ADD-mut ADHD-mullu misissuinissamut tungatillugu qaffariaateqartoqartoq immikkoortortaqarfiup malugisinnaavaa. 2022-mi septembarimi innuttaasut 200-t missaanniittut misissorneqarnissaminnut utaqqisuniipput. Taakkunannga innuttaasut 100-t ADD-mik ADHD-millu innarluuteqartutut pasineqartut utaqqisuniipput.

- Meeqqanut atatillugu tamanna atuarunnaarnerannik kinguneqarsinnaavoq. Siusinaarpallaartumik angerlartitsineq inuunerup maannakkut ingerlaneranut piffissamullu ungasinnerusumut ingerlaqqinnissaanut kingunerluuteqangaatsiarsinnaavoq, Anja Hynne Nielsen oqarpoq.

Pingaarnersiorneqarneq ajortut

Nalunaarusiaq decembarip arfineq-pingajuanni saqqummersinneqarpoq. Maanna sapaatit akunneri pingasut qaangiupput. Politikerit qisuariiateqarnissaminnut tulleriiaaginnarsimasut oqaatiginissaa pakatsinarsimassagaluarpoq. Muminganilli. Nipaalluinnartoqarpoq. Ataasituannguaq nalunaarutigineqartoq Peqqinnissamut Naalakkersuisoqarfimmit nassiunneqarpoq, tassanilu naammagittassuseqartoqarnissaanik oqaaseqartoqarluni.

- Nalunaarummi maannakkorpiaq iliuuseqartoqarniarneranik nalunaaruteqartoqanngilaq. Tamanna pingaarnersiuisoqannginneranut uannut takutitsivoq. Inuit maannakkorpiaq ikiorneqarnissaminnik pisariaqartitsipput. Tamanna ernumanarluinnarpoq, Inuit innarluutillit oqaaseqartartuat oqarpoq.

- Maannakkut aaqqiissuteqartoqarnissaa pisariaqartipparput.