Tilioq arlalinnit attavigineqartartoq – taakkulu Avannaata Kommunianeersuunerupput
![](/sites/default/files/styles/image_934x467/public/article_images/20200526_142924.jpg?itok=3admFb8d)
Inuit innarluutillit pillugit suliniaqatigiiffik Tilioq inunnit 219-init 2019-imi attavigineqarpoq.
Siorna saaffiginnittut 249-pput.
Tamanna Tiliup innuttaasut saaffiginnittarneranit misissuinerani nutami saqqummersinneqaqqammersumi paasissutissiissutaa.
Ajornartorsiutinik aaqqiiffigineqartariaqartoqangaatsiartoq, Tilioq nammineq naliliivoq. Inuimmi innarluutillit naammagittaalliuteqarnissamut pisinnaatitaaffimminnut periarfissaminnullu tunngatillugu siunnersorneqarnissaq pisariaqartippaat.
Aamma tapiissuteqarnissamut atortorissaaruteqartitsinissamullu aaqqiissutit pillugit Tiliumut saaffiginnittartut amerlanerpaapput. Tiliumut siorna saaffiginnissutigineqartut affangajaat tapiissutinut atortorissaarutinullu aaqqiissutinut tunngapput.
Nunaqarfinneersut amerlanerusut saaffiginnittartut
Saaffiginnittut amerlanerpaartaat Avannaata Kommunianeersuupput. Tilioq Qaanaamut paasititsiniaajartorluni siorna angalavoq – naatsorsueqqissaarnerullu takutippaa: mailikkut, allakkatigut oqarasuaatitigullu saaffiginnissutit 31 procentii nunatta avannaaneersuusut.
AAMMA ATUARUK Qaanaami innarluutillit peqatigiiffiata nalunaarut nuannaarutigaa: Maanna susoqassanersoq takussavarput
Inunnit illoqarfiit avataaneersunit 2020-mi saaffiginnissutit 2020-mi amerliartortut Tiliup maluginiarpaa: 2017-imit 2019-imut saaffiginnissutit 5 procentii ataallugit inunnit illoqarfiit avataaneersuusarput.
Kisitsit taanna siorna 9 procentip tungaanut qaffappoq.
Kalaallit Nunaanni Naatsorsueqqissaartarfik naapertorlugu innuttaasut 13 procentii 2020-mi illoqarfiit avataanni najugaqartuupput. Tamatuma saniatigut Tunumit saaffiginnissutit amerlerialaarput.
Aqqusinermi suliamik isumaginninneq
Tiliup Qaanaamut siorna maajimi tikeraarnerata kingorna isornartorsiuisumik nalunaarusiortoqarpoq: Pissutsit isornarluinnartut assersuusiorneqarnerannik qassiusunik taanna imaqarpoq: Suliamik isumaginninneq arriippallaarpoq, inuit issiavinni kaasuartakkaniittut kommunip allaffiinut innarluutilinnut naleqquttumik isaariaqannginnera pissutigalugu aqqusinermi sullinneqartarput.
Tamanna pissutigalugu suliniaqatigiiffiup avannaata kommuniata isaariatik innarluutinnut erngertumik naleqqussassagai innersuussutigaa, innuttaasunullu kommunit allaffiinukarsinnaanngitsunut isumaginninnissamut allatut aaqqiissuteqaqqusilluni.
Kommune Kujalleq Tiliumit siornaak tikeraarneqarpoq. Kommune Kujallermilu inunnut innarluutilinnut tapiissuteqarnissat amigaataanerat innarluutilinnullu sulisussaaleqineq tassani unammillernarnerpaat ilagaat.
Innarluutillit Illersuisuata Christina Johnsenip soraarnikuunera pissutigalugu Tilioq maanna innarluutilinnut illersuisoqanngilaq.