Avannaata Kommuniata allaffiini innarluutilinnut naleqquttumik isaariaqannginnera pissutigalugu inuit kaasuartakkanik atugaqartut igalaakkut aqqusinermilu sullinneqartariaqartarput.Assi: Tilioq

Qaanaami innarluutillit peqatigiiffiata nalunaarut nuannaarutigaa: Maanna susoqassanersoq takussavarput

Qaanaami innarluutillit peqatigiiffiata siulittaasuata innarluutillit illersuisuata pissutsitunik ernumanartumik qaqitsilluni nalunaarusiaa taperserpaa.

- Kinguneqarluarnissaa naatsorsuutigivara neriuutigalugulu. Kiisalu inuit innarluutillit atugarissaarnerulernissaanik kinguneqassasoq, tassa paasinarsissaaq iluamik ingerlatsisoqalissanersoq.

Korna Nielsen tusagassiuutinut nalunaarummi oqarpoq. Taanna Qaanaami innarluutillit peqatigiiffianni siulittaasuuvoq.

Qaanaami inuit innarluutillit

 

Kalaallit Nunaanni inuit innarluutillit qanoq amerlatigeqqissaarneri nalunaarsorneqanngillat.

 

Taamaammat Qaanaami nunaqarfiinilu inuit Innarluutillit amerlassusivii aamma oqaatigiuminaapput


Qaanaamili nunaqarfiinilu annertuumik innarluutillik 25-usut 2019-imi paasineqarpoq.
 
Annertuumik innarluuteqarneq tassa inuup pisinnaasai annertuumik appasittut.

 

Pisinnaasat taakku assersuutigalugu tassaasinnaapput:

 

Imminut asattorsinnaannginneq, atisalersorsinnaannginneq, nammineq nerisinnaannginneq illullu iluanilu silamilu nammineq angalasinnaannginneq.

 

Aamma attaveqarsinnaannginneq paasitinniakkamillu paasititsisinnaannginneq imaluunniit allat paasititsissutiginiagaannik paasititsisinnaannginneq ilaasinnaapput. 

Innarluutillit illersuisuata nalunaarusiaa ataasinngormat saqqummersinneqarpoq. Suliamik isumaginninnerit arriipput, issivimmilu kaasuartakkamik atugaqartunut kommunip allaffiinut isaariaqannginnera pissutigalugu aqqusinermi sullinneqartarput. Tamakku Christina Johnsenip Tiliullu nalunaarusiamini ernumanartut taasaannut ilaaginnarput.

Innarluutillit Illersuisuiat maajimi Qaanaamukarput, tassanilu inuit innarluutillit taakkulu qanigisaat naapippai.

Ikorfartortit erngertumik aallartittussat suli utaqqigaat

Innarluutillit peqatigiiffiata siulittaasuata oqarnera naapertorlugu Qaanaami suliat aallartisarneqartut malugisinnaalereerpaa.

Kisianni suli arriippoq.

AAMMA ATUARUK Innarluutillit illersuisuata angalanermik nalunaarutaa: Qaanaami innarluutillit puigorneqartutut misigisimapput

- Assersuutigalugu september aallartittoq inunnik isumaginnittoqarfimmiit inuk innarluutilik ikorfartorteqarnissaa piffissaq sivikinnerpaaq atorlugu ujarliunneqalerpoq.

- Kisianni suli tuttaqaqqinngillat, oqaraluarput pilertortumik ujarlissallutik, Korna Nielsen oqarpoq.

Innarluutillit peqatigiiffiata oqarnera naapertorlugu peqatigiiffiup siulersuisuisa innarluutillit illersuisuata nalunaarusiaa sapaatip-akunnerani matumani oqallisigissavaat.

Qaanaami innarluutillit peqatigiiffiat nutaajuvoq, taanna 2020-mi juunimi pilersinneqarpoq. Peqatigiiffiup Qaanaami innarluutillit ataatsimut najugaqarfigisinnaasaannik sullissivimmillu pilersitsisoqarnissaa maanna sulissutigaat.

Qaanaami innuttaasut aaqqissuussinermik ingerlalluartumik pisinnaatitaaffeqartut

Tiliup Avannaata Kommuniata Qaanaami inunnut innarluutilinnut ikiorsiissuteqarniartarnerminut sukaterinissaa Tiliup kissaatigaa.

- Qaanaami innuttaasut innarluuteqartut aaqqissuussinermik ingerlalluartumik pisinnaatitaaffeqarput. Innarluutillit pillugit inatsit malillugu tapersersuinermik ikiorneqarnissamillu qulakkeerisumik aaqqissuussinermik peqarnissaa pisinnaatitaaffigaat. Qaanaami allat tamarmik assigalugit inuuneqarsinnaatitaapput.

AAMMA ATUARUK Qaanaaq innarluutillit illersuisuannit tikeraarngaarneqalertoq

- Maannakkutut itsillugu Qaanaami minnerunngitsumillu nunaqarfinni inunnut innarluuteqartunut pissutsit ajornakusoorput, innarluutillit illersuisuat, Christina Johnsen oqarpoq.

Tiliup Qaanaap qanittuani nunaqarfinni Siorapalummi Savissivinnilu inuit innarluutillit kommunillu sulisui aamma oqaloqatigai.

Nalunaarut uani atuarsinnaavat.

Tikikkuminassuseq pissarsiariuminassuserlu, kommunimi suliassanik suliarinnittarneq, meeqqat inuusuttullu immikkut pisariaqartitsisut, suliffeqarneq aamma inuttut atugarliorneq navianartumiinnerlu nalunaarummi aamma sammineqarput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat