Innarluutillit illersuisuata angalanermik nalunaarutaa: Qaanaami innarluutillit puigorneqartutut misigisimapput
Naalagaaffiit Peqatigiit Inuit Innarluutillit Pisinnatitaaffii pillugit Isumaqatigiissut Qaanaami tamakkiisumik naapertorneqanngilaq. Innarluutillit illersuisuat, Christina Johsen, taama inerniliivoq.
Tilioqs anbefalinger med hensyn til handicapkonventionen
INASSUTEQAATIT
• Avannaata Kommuniata sanasut majorallaffinnik piaarnerpaamik ikkussinissaat qulakkkissagaa innuttaasullu kommunimut isersinnaanngitsut pillugit suliassat malorallaffiit ikkunneqarnissaasa tungaanut illersorneqarnissaamik avatangiiseqarluni suliarineqartarnissaannik allatut aaqqiissutinik nassaassasoq.
• Avannaata Kommuniata Pitsaaliuinermut Isumaginninnermullu
Aqutsisoqarfik suleqatigalugu aaqqiissutissanik naassaassasoq, taamaalilluni kommunimi neqeroorutini tamani Ussersorluni nutserisinnaasumik neqerooruteqartarnissamik periarfissaqavinniassammat. Tasunnga ilanngullugit Ilaqutariinnut
sullissivimi, kommunip allaffiani, utoqqaat illuanni Majoriamilu
• Tele Greenlandip internetikkut attaveqaat sukkasooq
annertusineqartussanngorpat pitsanngortinneqqartussanngorpallu
avinngarusimanerpaat saalliutissagai.
Inuit innarluutillit pillugit isumaqatigiissummi artikeli 9: Tikikkuminassutsimi inuit innarluutillit allatuulli peqataasinnaanngortillugit inuiaqatigiit aaqqissuunneqarnissaat qulakkeerneqassaaq.
Taanna Tiliumi suleqatinilu Qaanaami innarluutillit atugaannik paasisassarsioriartorlutik avannaanut tikeraarnikuupput.
- Qaanaap avinngarusimasumiinnera, tikikkuminaannera aammali kommunip aaqqissugaanermigut sulisunik taarseraattoqarfiuneratigut taava inuit Innarluutillit ajornartorsiutaat sakkortunerusutut ajornerusutullu misigineqartarput.
Inuit Innarluutillit illersuisuat Christina Johnsen Qaanaamut angalanermik nalunaarut Tilioq Avani saqqummiunneqarneranut atatillugu oqarpoq.
AAMMA ATUARUK Tiliumut saaffiginnittartut amerleriangaatsiartut
Tilioq angalanermik nalunaaruteqarpoq, taannalu saqqummeqqammerpoq.
Avannaata Kommuniata allaffeqarfia innarluutilinnut naleqquttumik isaariaqanngimmat kaassuaatinik atuisut kommunip allaffeqarfiata silataani sullinneqartariaqartartut, taakku tikeraarnerminni paasivaat.
Nalunaarut ima aamma imaqarpoq:
- Sulianik ingerlatsineq arriippallaartoq sammineqarput, inunnut innarluutilinnut sullissisut taarseraanerujussuat inuillu innarluutillit tapersersorneqarnissaannut inatsisip atuutsikkuminaatsinneqarnera qulaajarneqarput.
Innarluutilinnik sullissisut soorlu suliamik ingerlatsisut ikorfartortillu pineqarput.
Puigorneqartutut misigisimasut
Innarluutillit illersuisuat innarluutillit 47-t taakkulu ilaqutaat immikkut ataatsimeeqatigai. Nunatsinnilu oqartussanit assigiinngitsunit maluginiarneqarpallaartaratik, oqaloqatigisai oqarput.
- Amerlasuut oqaluttuarput Qaanaamut angalaneq akisummat piffissamillu sivisuumik atuiffiusarmat Kalaallit Nunaanni oqartussanit assigiinngitsunit maluginiarneqarpallaartaratik. Amerlasuut tassunga tapiliullugu oqaatigaat puigorneqartutut misigisimallutik. Tamanna Qaanaamut tikeraarnitsinni aamma paasivarput, Christina Johnsen oqarpoq.
AAMMA ATUARUK Qaanaaq innarluutillit illersuisuannit tikeraarngaarneqalertoq
Innarluutillit illersuisat Qaanaami angalanermik inassuteqaatitalimmik nalunaaruteqarpoq, Avannaata Kommuniatalu allaffeqarfii pitsanngorsagassaasut ilaatigut inassuteqaatigaa. Aamma Naalakkersuisut, Namminersorlutik Oqartussat, Inatsisartut, Peqqinnisaqarfik, Tele Greenland KNR-ilu inassuteqarfigai.
- Inassuteqaatigineqartut aallaavigalugit iliuuseqartoqarsinnaavoq, isumassarsiorfiusinnaapput. Tassami imaassinnaasoq pisortat oqartussallu maanna iliuuseqalereersut.
- Pingaaruteqarporliinassuteqaatit iliuuseqarfigineqarnissaat, taamaasillutalu Kalaallit Nunaanniit Naalagaaffiit Peqatigiit inuit Innarluutillit pisinnaatitaaffii pillugit isumaqatigiissutaannik malinnissinnaalissaagut inuillu Innarluutillit ikiorneqarlutillu tapersersorneqarnissaat qulakkiissavarput, soorlu tamanna inuit Innarluutillit tapersersorneqarnissaanut inatsimmi pisinnaatitaaffigigaat, Christina Johnsen oqarpoq.
Qaanaamiut systemimik atorneqarsinnaasumik pisariaqartitsisut
Tiliup Avannaata Kommuniata Qaanaami innarluutilinnik pitsaanerusumik sullisseriaaseqaleqquaa.
- Qaanaami innuttaasut systemimik atorneqarsinnaasumik pisariaqartitsipput. Aamma ikiorneqarnissamik tapersersorneqarnissamillu qulakkeerisumik suleriaatsimik aaqqissuussisoqarnissaa pisinnaatitaaffigaat, Qaanaami innuttaasut allat naligalugit inuit Innarluutillit inuuneqarnissaminnut pisinnaatitaaffeqarput.
- Tassami massakkut Qaanaami nunaqarfiinilu inunnut innarluutilinnut atugassarititaasut ilungersunarput, Inuit Innarluutillit illersuisuat Christina Johnsen oqarpoq.
Tilioq Qaanaap eqqaani nunaqarfinni Siorapalummi Savissivimmilu innarluutillinnik kommunillu allaffeqarfiini sulisunik aamma oqaloqateqarpoq.
Nalunaarut uani atuarsinnaavat. Tikikkuminassuseq pissarsiariuminassuserlu, kommunimi suliassanik suliarinnittarneq, meeqqat inuusuttullu immikkut pisariaqartitsisut, suliffeqarneq aamma inuttut atugarliorneq navianartumiinnerlu nalunaarummi aamma sammineqarput.
