Tiliumut saaffiginnittartut amerleriangaatsiartut
Tiliullu 2019-imut ukiumoortumik nalunaarusiaa naapertorlugu saaffiginnittartut amerleriangaatsiarsimapput.
AAMMA ATUARUK Nunarput Inunnut Innarluutilinnut illersuisoqalertoq
2018-imi saaffiginnittut 135-usimapput, siornalu 209-inut amerleriarsimallutik. Inuit innarluutillit illersuisuat tamanna pillugu oqaloqatigaarput.
- Takusinnaavarput kommunimi sullissinerit taakku initoorujussuusut. Arlaatigut ikiorsiissutinik qinnuteqartut atortorissaarutit imaluunniit støttepersoninik tapersersuisut aamma initupput, Christina Johnsen oqarpoq.
AAMMA ATUARUK De lange sagsbehandlingstider kan knække mennesker
- Ilisimaneqarnerulerpugut, malugivarput taanna. Saaffiginnittartut takusinnaasarpagut soorlu suminngaanniit saaffiginnittarpat. Soorunalimi immaqa Kommuneqarfik Sermersooq anginerpaammat tassanngaanneersut amerlanerusarput, kisianni sineriak tamakkipajaarlugu nalunnginneqalereerpugut. Kisianni ippigilaarparput soorlu Tasiilakkut Illoqqortoormiullu tutsaqarpiarneq ajormata, Inuit Innarluutillit illersuisuat, Christina Johnsen oqarpoq.
Tilioq Namminersorlutik Oqartussat ataanni inissisimavoq, Tiliullu 2018-imi aallartinneraniilli aningaasaliissutit 1 millionit koruuninik amerlineqarlutik.
AAMMA ATUARUK Angalaniarnerni pissutsit innarluutilinnut naammaginanngitsut
Innarluutillit, qanigisaasut kommuuninillu sullissisut Tilioq saaffigisarsimavaat.
Tiliumut apeqqutigineqarnerusartut tassaapput: innarluutilinnut atortut ikiorsiissutit, pisortanit ikiorsiissutit innarluutilinnullu tapersersortitut sullissisoqartarnerit.
Innarluutilinnut isiginnittariaaseq aamma saaffiginnittartut sukumiinerusumik nalunaarsorneqarnerat pillugit misissuinerit saqqummersinneqangajalersut, Inuit innarluutillit illersuisuata aamma oqaatigaa.
- Taava aamma soorlu kisitsisit paasissutissallu nunatsinni ikittuararsuugamik, taamaammat aallartikkattali massakkumut paasisagut amerlinikuupput soorunalimi, aamma taamaattuaannassaaq, Inuit Innarluutillit illersuisuat, Christina Johnsen oqarpoq.
