Illersuisoq: Pisortat paamaarussinerat sullinneqartut unittuussutigisarpaat

Ombudsmandip isornartorsiutigisai, Inuit innarluutillit illersuisuata Christina Johnsenip ilisarisinnaanerarpai. Saaffiginnittut pisortanit akineqarnissartik utaqqisarpaat tamannalu unittoornermik kinguneqarsinnaasarluni.

- Isornartorsiutit ajoraluartumik ilisarnarput, inuimmi utaqqikatattarput ingerlariaqqinnissaminnullu unittooqqasarlutik, Christina Johnsen oqarpoq.

Siusinaartumik pisartagaqarnissamik immikkullu tapersersorteqarnissamik qinnuteqaatit piffissami sivisuumi suliarineqartarput, suliallu paamaarunneqarneri pissutigalugit Tiliumut akulikitsumik saaffiginnittoqartarpoq.

AAMMA ATUARUK Meeqqap innarluutillip ikiorserneqarnissaa pillugu suliaq sakkortuumik isornartorsiorneqartoq

- Angajoqqaat unittooqqasut saaffiginnittuartarput, tapersersorteqarnissamik siusinaartumillu pisartagaqarnissamik qinnuteqarsimasut piffissami sivisuumi utaqqisariaqartarput, utaqqisarneq saaffiginnittunut ilaqutaanullu kinguneqartarpoq, inuimmi saaffiginnissimasut naggataativut qasulertarput,  Inuit innarluutillit illersuisuat, Christina Johnsen nassuiaavoq.

Sullissisarneq aaqqiissuteqarfigineqassappat kommunit akisussaaffimmik tigusinissaat pffissanngorsorineqarpoq.

- Oqartoqartuaannarsinnaanngilarmi – ajornartorsiut taanna uanga ilisarisinnaanngilara, imaluunniit uagut kommuunitsinni taamaattoqanngilaq, imaluunniit tusatsiakkat aallaavigalugit taama oqaluttoqarpoq, oqaatsit tamakkua tusartuartakkavut akulikilliartorput, taamaattumik ajornartorsiutaasut nassuerutigisinnaagaanni takusinnaagaanniluunniit sulinissaq orniginarnerulissagaluarpoq, Inuit innarluutillit illersuisuat, Christina Johnsen KNR-imut oqarpoq.